Óskemende afrıkalyq eki muǵalim dombyra shertip, qazaqsha án aıtady
ÓSKEMEN. KAZINFORM – Nıkolas Kaemba men Alıý Mýantaga Afrıkadan Qazaqstanǵa kelip, Óskemendegi mektepte aǵylshyn tilinen sabaq berip júr.
Birde dombyra shertip otyrǵan oqýshyny kórip qalǵan olar qazaqtyń ulttyq aspabyna qyzyǵa ketken. Al buny estigen dombyra muǵalimi Talǵat Ábishev ekeýine qýana-qýana úıretýge kelisti. Qazir afrıkalyqtar aspapta oınap qana qoımaı, án de salady.
Ońtústik Afrıkadaǵy Ýganda eliniń azamaty Nıkolas Kaemba Óskemen qalasyndaǵy «Nurorda» mektep-lıtseıinde aǵylshyn tilin oqytyp júrgenine 8 aı boldy. Alǵash ret óz elinen shyǵyp Qyrǵyzstanǵa jumysqa barǵan. Sodan soń 4 jyl Túrkııada eńbek etipti.
«Qazaqstannan shaqyrtý túsken soń kóp oılanbaı kelistim. 2023 jyldyń qyrkúıek aıynan beri osyndamyn. Ortalyq Azııa elinde birinshi ret emespin. Sondyqtan da mundaǵy qonaqjaılylyqty, mentalıtetti bilemin. Qazaq halqynyń óz salt-dástúrin, tilin, mádenıetin qurmetteıtinin, baǵalaıtynyn kórdim. Bul óte durys», - deıdi Nıkolas Kaemba.
Al Alıý Mýantaga Batys Afrıkadan kelgen. Qazaqstan ol úshin týǵan jerinen attap basqan alǵashqy shet memleketi bolyp otyr. Sondyqtan da oǵan barlyǵy tańsyq.
«Maǵan elderińiz unap jatyr. Ásirese baı mádenıetterińiz ben halyqtyń meıirbandyǵyn atap ótkim keledi. Dombyraǵa qalaı qyzyqqanymyz jaıly aıtar bolsam, birde mektep dálizinde kele jatqanbyz. Qolyna bir aspapty ustap, shertip otyrǵan balany kórip qaldyq. Daýysy qatty unady. Erekshe áser syılaıdy eken. Keıin bul aspaptyń dombyra ekenin bilip, ózimizge nege shertýdi úırenip almasqa dep oıladyq», - deıdi Alıý Mýantaga.
Talǵat Ábishev «Juldyz» óner mektebinde jumys isteıdi. Bıylǵy oqý jylynan shaqyrtýmen «Nurorda» mektep-lıtseıiniń oqýshylaryna dombyra úıirmesinen sabaq bere bastaǵan. Nıkolas Kaemba men Alıý Mýantaganyń qos ishekti aspapqa qyzyǵýshylyǵy baryn estigende úıretýge qýana-qýana kelise ketken.
«Qańtar aıynan beri aptasyna bir ret jarty saǵattan úıretip kelemin. Ózim aǵylshyn tilin bilmegendikten basynda azdap qoryqqanym ras. Biraq Nıkolas oryssha jaqsy sóıleıdi eken. Ýaqyt ótken saıyn nátıje baıqalýda. Áriptesterime naýryz aıynan halyq ánderin de úıretýge kóshtim. Kúnde Whatsapp messendjeri arqyly «Gúlderaıym» ániniń bir-bir sózinen jiberip otyrdym. Nıkolas pen Alıý ony jattap, aǵylshynshaǵa aýdaryp, maǵynasyn da túsinip alady», - deıdi Talǵat Ábishev.
Onyń aıtýynsha, ekeýiniń de qabiletteri bar. Nıkolas barabanda oınaı biledi eken.
«Olar óte eńbekqor. Úıretýge jeńil boldy. Ekeýi de ózderine dombyra satyp aldy. Úıde de shertip, úırengenderin bekitip, kún saıyn shabytpen keledi», - deıdi dombyra muǵalimi.
Osylaısha, qazir Nıkolas Kaemba men Alıý Mýantaga «Gúlderaıym» men «Bala-bala» ánderin dombyramen aıta alady. Endi halyq kúıi «Tepeńkókti» úırenýde. Osy kúni kúıdiń jartysyn shertip tur. Alda odan keıin taǵy basqa ánder men kúılerdi úırenýge nıetti.
«Qazaqstandyqtardy 1 mamyr – Birlik kúnimen quttyqtaımyz! Beıbitshilik pen órkendeý tileımiz. Ulttyq aspaptaryńyzdy úırenip jatqanymyzdy maqtan tutamyz. Alǵa qaraı damı berińizder», - deıdi Alıý Mýantaga.
