Óskemende AES mamandaryn daıarlaıtyn jańa bilim berý baǵdarlamasy iske qosylmaq
ÓSKEMEN. KAZINFORM — Óskemen qalasyndaǵy D. Serikbaev atyndaǵy Shyǵys Qazaqstan tehnıkalyq ýnıversıtetinde 2025-2026 oqý jylynan bastap «Atom elektr stantsııasyn paıdalaný» atty jańa bilim berý baǵdarlamasy iske qosylady.
Bul baǵdarlama Halyqaralyq atom energııasy agenttigi (MAGATE) sarapshylarynyń qatysýymen ázirlenip, eldegi alǵashqy atom elektr stantsııasyna qajetti joǵary bilikti mamandardy daıarlaýǵa baǵyttalǵan.
MAGATE sarapshylarynyń usynystaryna sáıkes daıyndalǵan oqý jospary ıadrolyq energetıka salasynyń negizgi aspektilerin qamtıdy. Oqytylatyn pánder qatarynda atom stantsııalarynyń jabdyqtary, ıadrolyq reaktorlar fızıkasy, radıatsııalyq qaýipsizdik, ıadrolyq otyn tsıkli, jabdyqty jańǵyrtý men montajdaý sııaqty mańyzdy baǵyttar bar.
Sonymen qatar stýdentter teorııalyq bilimmen qatar Kýrchatov qalasyndaǵy Ulttyq ıadrolyq ortalyqta jáne Óskemendegi metallýrgııalyq zaýytta tájirıbeden ótedi.
— Biz Qazaqstannyń búkil bolashaq atom ónerkásibiniń irgetasy bolatyn baǵytty qolǵa alyp otyrmyz. Túlekterimiz ozyq bilim alyp, álemniń kez kelgen jerinde jumys isteı alatyn bolady, — deıdi dekan Aıbek Aqaev.
2025 jylǵy sáýirde ýnıversıtet qabyrǵasynda MAGATE men Reseıdegi Ulttyq zertteý ıadrolyq ýnıversıteti MIFI ókilderiniń qatysýymen halyqaralyq forým ótip, onda atom salasyndaǵy bilim berý men kadrlyq áleýetti damytý máseleleri talqylanǵan. Baǵdarlamanyń akademııalyq komıtetine ýnıversıtettiń jetekshi oqytýshylary men óndiris ókilderi kirdi.
Baǵdarlama halyqaralyq ıadrolyq qaýipsizdik talaptaryna tolyq saı keledi. Bul óz kezeginde Qazaqstannyń atom energetıkasy salasyndaǵy kadrlyq rezervin qalyptastyryp qana qoımaı, eldiń energetıkalyq qaýipsizdigin nyǵaıtyp, tehnologııalyq táýekelderdi azaıtýǵa yqpal etedi. Baǵdarlama alǵashqy iske qosylǵan jyly-aq halyqaralyq standarttarǵa saı alǵashqy akkredıtteýden ótýge daıyndalyp jatyr.
Eske salsaq, osyǵan deıin Qazaqstanda alǵashqy AES-ke ataý beriletindigi habarlanǵan.