Óskemende «Adamzattyń Abaıy» atty mereıtoılyq shara ótti

ÓSKEMEN. QazAqparat - Óskemen qalasyndaǵy A.Pýshkın atyndaǵy oblystyq kitaphanada Abaıdyń 175 jyldyǵynyń saltanatty ashylýy ótkizildi, dep habarlaıdy QazAqparat.

Mereıtoılyq sharaǵa oblystyq máslıhat depýtaty Ánýarbek Muhtarhanov, Reseıdiń Óskemen qalasyndaǵy bas konsýly Mıhaıl Korolev, belgili jazýshy, abaıtanýshy Qalıbek Altybaev, Qazaqstandaǵy tuńǵysh «Ákeler mektebiniń» negizin qalaǵan Ertisbek Sádýaqasov qatysty.

«Bıylǵy jyly mádenı sharalarǵa josparlanǵan qarjynyń edáýir úlesi uly aqynnyń 175 jyldyǵyn atap ótýge jumsalady. Abaıdyń ataqonysy Jıdebaı abattandyrylyp, birqatar aýdandarda eskertkishter ornatý josparlanyp otyr. Hákimniń mereıtoıy tek respýblıka kóleminde emes, halyqaralyq deńgeıde atap ótiledi», – deıdi Ánýarbek Muhtarhanov.

Ashylý saltanatynan soń «Men bir jumbaq adammyn» sózjumbaq saıysy ótkizildi. Qatysýshylar «Abaı júregimde» atty ashyq mıkrofonda aqynnyń óleńderin oqyp, ánderin shyrqady. Sondaı-aq oblystyq Tilderdi damytý basqarmasynyń Lıngvıstıkalyq ortalyǵynyń mamandary daıyndaǵan Abaı shyǵarmashylyǵy boıynsha latyn álipbıinde dıktant jazdy.

«Abaı atamyz ár shyǵarmasynda adamgershiliktiń shyńy - moral ekenin jan-jaqty jetkizdi. Onyń 45 qara sózine jekeleı úńilsek, ár aıtqanynan óskeleń urpaǵyna baǵyt-baǵdar berýge tyrysqanyn ańǵarý qıynǵa soqpaıdy. Jastar tarapy jýyrda Semeıde boı kótergen «Abaı Arenada» jattyǵýlaryn jasap, baıraqty básekelerde el mereıin asyrsa, ataýly datany laıyqty atap ótýge súbeli úles qosqany dep bilemin» deıdi ShQMÝ «Jýrnalıstıka» mamandyǵynyń 4-kýrs stýdenti Ádilhan Esimhanov.