Óskemende adam pyshaqtaǵan kúdiktini ıt ustap berdi
ÓSKEMEN. QazAqparat - Ulttyq ulannyń Shyǵys óńirlik qolbasshylyǵyna qarasty № 5518 áskerı bóliminiń jaýyngerleri qyzmettik ıttiń kómegimen adam pyshaqtaǵan kúdiktini ustady, dep habarlaıdy QazAqparat tilshisi.
24 sáýir kúni saǵat 20-10-da Óskemen qalalyq ishki ister bólimine 1998 jyly týǵan boıjetken ózine belgisiz jigittiń pyshaqpen shabýyldaǵanyn habarlaıdy. Oqıǵa Temırıazev kóshesinde bolǵan. Búktemeli pyshaqpen qyzdyń betine birneshe ret pyshaq siltegen qaskúnem oqıǵa ornynan izin sýytyp úlgergen.
Sol kúni kezekshilik atqaryp júrgen Ulttyq Ulan sarbazdary Tasqyn Nııazhanov pen kınolog Rýslan Raısov jedel taraǵan aqparat boıynsha kúdiktiniń izine túsken. Kúdiktini olarǵa «Sımba» esimdi qyzmettik ıt ustap bergen.
«Bizge aqparat túsken boıda izdeý jumystaryn bastap kettik. Mıhaelıs kóshesiniń aýlasynda 2 jigitti toqtatyp, qujattaryn suraı bastaǵanda eki jaqqa qasha jóneldi. Bireýiniń sońynan kishi serjant Tasqyn Nııazhanov ketti de, men bireýine «Sımbany» jiberdim. Ol tumyldyryqpen júrgendikten, kúdiktini denesimen qaǵyp qulatty. Bettestirý kezinde jábirlenýshi ekeýin de jazbaı tanydy» - deıdi serjant Rýslan Raısov.
Kınologtyń aıtýynsha, «Sımba» tórt jastaǵy belgııalyq ovcharka eken. Násili malınýa tuqymyna jatady.
«Jábirlenýshige pyshaq siltegen kúdikti Ahmer aýylynyń 1997 jylǵy turǵyny bolyp shyqty. Ol Úlbi polıtsııa bólimshesinde kinásin moıyndaǵan» - deıdi «Shyǵys» óńirlik qolbasshylyǵynyń baspasóz qyzmetiniń bastyǵy Baǵdat Amangeldi.
