Óskemende ábden tozǵan lıftter qashan jańartylady

ÓSKEMEN. Óskemen qalasynda 2026 jyly kommýnaldyq menshikte turǵan jáne tehnıkalyq turǵyda tozyǵy jetken 40-tan astam lıft aýystyrylmaq.

Áńgime 2017 jyly qala balansyna qabyldanǵan, alaıda quqyqtyq shekteýlerge baılanysty osy ýaqytqa deıin tolyq jóndeýden ótpegen lıftter týraly bolyp otyr.

Búginde Óskemende shamamen 740 lıft bar, olardyń jartysynan kóbi apatty jaǵdaıda nemese qaýipsizdik talaptary saqtalmaı jumys isteıdi.

Buǵan qosa, múlde lıfti joq úıler de bar. Keıbir kópqabatty turǵyn úılerge 20 jyldan astam ýaqyt boıy lıft ornatylmaǵan.

Mundaı jaǵdaı Chehov, Karbyshev, Tıhaıa, Kalının kóshelerindegi, Gagarın býlvary men Sátbaev dańǵylyndaǵy úılerde tirkelgen. Qaǵaz júzinde lıftiler bar dep eseptelgenimen, is júzinde turǵyndar osy jyldar boıy jaıaý kóterilýge májbúr.

Qala ákimdiginiń málimetinshe, lıftterdiń bir bóligi 2017 jyly kommýnaldyq menshikke ótken. Sol kezde júzden astamy jóndeldi. Alaıda tekserý komıssııasynyń qorytyndysynan keıin zańnama talaptarynyń buzylýy anyqtalyp, bıýdjet qarajaty esebinen qarjylandyrý toqtatylǵan. Sonyń saldarynan 95 lıft memlekettik balansta qalǵanymen, jóndeý kórmedi.

— Bul lıftter áli de kommýnaldyq menshikte. Qazir olardy zańdy túrde aýystyrý tetigin pysyqtap jatyrmyz. Jobalyq-smetalyq qujattama ázirlenýde. 2026 jyly Mogılev qalasyndaǵy lıft jabdyqtaryn shyǵaratyn zaýytpen birlesip, 40-tan astam kótergishti jańartýdy josparlap otyrmyz. Eń bastysy, bıýdjetten qarjy qarastyrylsa bolǵany, — deıdi Óskemen qalasy turǵyn úı qatynastary bólimi basshysynyń orynbasary Nazgúl Jaqypbekova.

Al lıftterdi turǵyndardyń óz qarajaty esebinen aýystyrý nusqasy kóp úı úshin qoljetimsiz bolyp otyr. Bir kótergishti tolyq jabdyǵymen qosa kúrdeli jóndeýden ótkizý quny 12-18 mln teńge aralyǵynda. Mundaı shyǵyn kóptegen páter ıeleri úshin aýyr salmaq ekeni anyq.

Eske salsaq, osyǵan deıin paıdalanylǵanyna 25 jyldan asqan lıftilerdi aýystyrý jáne jóndeý jol kartasy ázirlenetindigi habarlanǵan.