Óskemende «Abaıdyń quqyqtyq kózqarastary jáne «Qaramola erejesi» atty semınar ótti
Vebınarda S.Amanjolov atyndaǵy ShQÝ rektory, professor Muhtar Tólegenniń «Abaıdyń quqyqtyq kózqarastary jáne «Qaramola erejesi» atty monografııasynyń tanystyrylymy boldy.
Atalǵan ǵylymı eńbekte Abaı Qunanbaıulynyń qazaqtyń burynǵy bılik júıesine aıtýly ózgerister engizip, óz aldyna zań jazyp, ony is júzinde oryndap, «Tóbe bı» bolǵany dáleldengen.
Sondaı-aq hakimniń 1885 jyly jazǵan «Qaramola erejesi» men quqyqtyq kózqarastary arnaıy qarastyrylǵan. Atadan balaǵa mıras bolyp kele jatqan ádet-ǵuryp negizinde jasalǵan ereje - qazaqtyń quqyq tarıhynda tuńǵysh ret tasqa basylǵan qujat. Bul HІH ǵasyrdyń aıaq kezindegi el tarıhynda bolǵan aıtýly oqıǵanyń biri.
«74 baptan turatyn Abaıdyń «Qaramola erejesinde» ádildikke, bereke-birlik pen tynyshtyqqa bastaǵan tártipter men normalar berik saqtalǵan. El Táýelsizdiginiń 30 jyldyq mereıtoıy qarsańynda jaryq kórgen kitap quqyq, zań salasynyń mamandaryna, stýdentterge, jalpy kópshilik qaýymǵa arnalǵan», - deıdi ShQÝ rektory Muhtar Tólegen.
Onlaın formatta ótken sharaǵa qazaqstandyq jáne shetel ǵalymdary, ustazdar, bilim jáne mádenıet salalarynyń ókilderi, memlekettik qyzmetkerler, magıstranttar men stýdentter qatysty.
