Óskemende 954 úıdi sý basýy múmkin
ÓSKEMEN. QazAqparat – Óskemen qalasynda 954 úıdi sý basý qaýpi bar, dep habarlaıdy QazAqparat tilshisi.
Qalalyq Tótenshe jaǵdaılar basqarmasynyń bastyǵy Andreı Andreıkonyń aıtýynsha, búginde jerdiń tońy 72 sm-ge jetken. Al qar jamylǵysynyń bıiktigi 33 sm quraıdy. Shahar aýmaǵynan 145 myń tekshe metr qar shyǵarylǵan.
«Sý basý qaýpi bar 954 úıde 2407 adam turady. Qutqarýshylar sý tasqynyna qarsy is-sharalar josparyna sáıkes áreket etip, atalǵan aýmaqtarǵa baqylaý júrgizýde. Osy ýaqytqa deıin 30 shaqyrym kanal, 24 shaqyrym aryq tazalandy», - dedi Andreı Andreıko.
Sonymen qatar syıymdylyǵy 835 adamdy quraıtyn ýaqytsha ornalastyrýdyń 8 pýnkti qurylǵan. Kóktemgi sý tasqynyna daıyn bolý úshin 195 arnaıy tehnıka, jeke quramnan 200-den astam adam jáne 63 motopompa ázir tur.
