Óskemende 9-qabattan sekirip ólmek bolǵan jas jigit qutqaryldy
ÓSKEMEN. QazAqparat – Óskemende 9-qabattan sekirmek bolǵan er adam qutqaryldy, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, 9 jeltoqsan keshki ýaqytta «102» arnasyna belgisiz er adamnyń Krasın kóshesinde ornalasqan kópqabatty úıdiń 9 qabatynan sekirmekshi bolyp turǵany týraly habar tústi.
Sol kezde oqıǵa ornyna «Qyran-28» ekıpajynyń qyzmetkerleri Almas Qarashov pen Ánýar Muhametqalıev jáne olardyń vzvod komandıri Dáýren Toqtasyn kelip jetken.
Olar bıikten sekirgeli turǵan 25-30 jas shamasyndaǵy jigitti jáne ony sózge aınaldyryp turǵan azamatty baıqaıdy.
«Rota komandıri ary qaraı kelissóz júrgizý úshin astyńǵy qabatta qalyp, Almas pen Anýar 9 qabatqa tez arada kóterilgen. Osy kezde TJD qyzmetkerleri oqıǵa ornyna shaqyryldy. Er adam polıtseılerdi kórgen boıda odan saıyn ashýǵa býlyǵyp, olardyń jaqyndamaýyn talap etti. Dese de, ony áńgimege tartqan polıtsııa qyzmetkerleri qutqarýshylarmen birge aqyryn jaqyndap, jigitti qapsyra ustap, tartyp alyp shyqqan» dep habarlady vedomstvo ókilderi.
Óz ómirin ólimge qımaq bolǵan turǵynǵa medıtsınalyq kómek kerek ekendigin baıqaǵan polıtseıler ony jedel járdemge jetkizdi.
Medıtsına qyzmetkerleriniń aıtýynsha, er adam óte qatty kúızeliske túsken, tipti óziniń áreketin túsindire almaǵan. Al polıtsııaǵa qońyraý shalǵan azamat - Óskemen qalasyndaǵy 5518 áskerı bóliminiń bólimshe komandıri, aǵa serjant Nurjan Imanjanov.
