Óskemende 85 jastaǵy keıýanany óz uly tonap ketti
ÓSKEMEN. QazAqparat – Óskemende 85 jastaǵy zeınetkerdi óz uly tonap ketken. Bul týraly QazAqparat Shyǵys Qazaqstan oblysynyń polıtsııa departamentine silteme jasap habarlaıdy.
«Oqıǵa mereke kúni bolǵan. 85 jastaǵy zeınetkerdi týǵan uly tonap ketken. Anasynyń qolynda turatyn 59 jastaǵy er adam tósenish astyndaǵy 640 myń teńge men 300 AQSh dollaryn kórsetpeı qoldy qylǵan. Kúdikti óz kinásin moıyndap, túsinikteme berdi», - delingen departamenttiń baspasóz qyzmeti taratqan málimette. Al jalǵa páter berýmen aınalysatyn 46 jastaǵy óskemendik áıel óz «klıentinen» zardap shekken. «29 tamyzda «102» kanalyna qońyraý tústi. Páterdi táýlik boıyna jalǵa berýmen aınalysatyn áıel kezekti klıentinen zardap shekken. Ýaǵdalasqan sátte páterdi qabyldap alýǵa kelgen úı ıesi turmystyq tehnıkanyń bári urlanǵan kóredi. Kúdikti ustaldy. 33 jastaǵy birneshe ret sottalǵan azamatqa qarsy QR Qylmystyq kodeksiniń 188-babynyń 1-bóligi boıynsha sotqa deıingi tergeý bastaldy», - delingen departament dereginde.
