Óskemende 800-ge jýyq tiginshi 2 shaqyrymdyq quraq kórpe tósep, álemdik rekord ornatty
ÓSKEMEN. KAZINFORM — Óskemen qalasynda Qazaqstannyń 17 óńirinen kelgen 800-ge jýyq tiginshi 2 shaqyrymdyq quraq kórpe tósep, álemdik rekord ornatty.
14-17 mamyr aralyǵynda Shyǵys Qazaqstanda «Ǵasyrlyq dástúrler» kilem toqý jáne sándik-qoldanbaly óner buıymdarynyń halyqaralyq festıvali ótip jatyr. Sonyń aıasynda búgin Óskemendegi «Vostok» stadıonynda Ázerbaıjan, Reseı, Qytaı, Túrkııa, Mońǵolııa, Ózbekstan, Qyrǵyzstan, Tatarstan memleketterinen jáne ózge óńirlerden 789 qolóner sheberi jınaldy.
Olar 2 shaqyrymdy quraıtyn alaman quraq kórpe jaıdy. Bul oqıǵa «Global Best of Records» halyqaralyq rekordtar kitabyna engizildi. Halyqaralyq otbasy kúnine oraı uıymdastyrylǵan sharanyń basty maqsaty — ulttyq etnografııalyq mura men sándik-qoldanbaly ónerdi nasıhattaý.
— Sonymen qatar festıval aıasynda sheberlik saǵattary, taqyryptyq kórmeler men shyǵarmashylyq zerthanalar, etnomádenı birlestikterdiń ókilderimen kezdesý, qala jáne aýdandardaǵy mádenıet qyzmetkerleri úshin beıindi oqytý semınary uıymdastyrylyp jatyr. Arnaıy kontsertte etnıkalyq mýzyka sheberleri óner kórsetip, kórermenge erekshe áser syılady, — dep habarlady oblys ákimdiginen.
Eske salsaq, osyǵan deıin Tashkenttegi Islam órkenıeti ortalyǵy Gınnestiń rekordtar kitabyna engeni habarlanǵan.
