Óskemende 80-nen asqan qarttar da endi tramvaıda jolaqy tóleýge mindetti

ÓSKEMEN. KAZINFORM — Óskemen qalasyndaǵy tramvaılarda 80-nen asqan qarttarǵa jasalǵan jeńildik alynyp tastaldy.

Taıaýda tramvaılarda zeınetkerlerdiń bárinen 50 teńge kóleminde jolaqysy talap etile bastady. Al buǵan deıin 80-nen asqan qarttar tegin júre alatyn. Bunyń sebebin qala ákimdiginen túsindirip berdi. 

— Tramvaılar jumysyna júrgizilgen tekserýler barysynda kásiporynnyń normatıvtik-quqyqtyq aktilerde kózdelmegen jol júrý jeńildikterin birjaqty tártipte belgilegeni anyqtaldy. Zań boıynsha kásiporynnyń mundaı quqyǵy joq. Qoǵamdyq kólikte jol júrý aqysyn tóleý kezinde jeńildikter ala alatyn azamattardyń barlyq sanaty qoldanystaǵy zańnamaǵa jáne jergilikti atqarýshy organdardyń sheshimderine sáıkes aıqyndalady, — dep habarlady Óskemen qalasy ákimdiginiń baspasóz qyzmetinen.

Qala ákimdiginiń 2021 jylǵa arnalǵan birlesken qaýlysy men máslıhatynyń sheshimine sáıkes, 80 jasqa tolǵan azamattardyń jol júrý aqysy 50 teńgeni quraıdy. Qazirgi ýaqytta tegin jol júrý quqyǵy kelesi sanattarǵa ǵana beriledi: kópbalaly otbasynan shyqqan oqýshylar jáne memlekettik ataýly áleýmettik kómek alatyn oqýshylar.

— Dese de qazirgi ýaqytta jeńildetilgen sanattar tizimin keńeıtý jumystary júrgizilip jatyr. Atap aıtqanda, 80 jastan asqan azamattarǵa tegin júrý quqyǵyn berý máselesi qarastyrylýda, — delingen habarlamada.

Eske salsaq, osyǵan deıin Qazaqstandaǵy tramvaılardyń jaǵdaıy týraly saraptamalyq maqala jazǵanbyz.