Óskemende 70 jyl jylýsyz otyrǵan kópqabatty úıler ortalyq jelige qosylatyn boldy

ÓSKEMEN. QazAqparat - Óskemen qalasynyń Ablaket kentindegi Chelıýskın kóshesiniń 6 turǵyn úıi 70 jyl boıy peshpen jylytylyp kelgen, dep habarlaıdy QazAqparat tilshisi.

 Qart turǵyndardyń aıtýynsha, mundaǵy jylýsyz otyrǵan úıdiń eń kóne degenderi 1947 jyly salynǵan eken. Sodan beri mundaǵylar  qosqabatty úıdegi páterin pesh jaǵyp,  jylytyp kelgen. 2011 jyly Ablaket kentiniń turǵyn úı-kommýnaldyq sharýashylyǵy jaǵyrtylǵan kezde de bul 6 úı nazardan tys qalǵan.  Sol tustan beri 48 páterdiń muńyn arqalaǵan bastamashyl toptyń ashpaǵan esigi, tozdyrmaǵan tabaldyryǵy joq. Kórshileriniń quqyǵyn qorǵap júrgen belsendi zeınetker Nına Şýka qalalyq ákimdikten mardymdy jaýap bolmaǵan soń oblys ákimine aryz joldaǵanyn aıtady. Oblys ákimi Danıal Ahmetov sol hattyń negizinde halyqpen kezdesti.

«71 jyl buryn salynsa da, bul 6 úıge jylý men ystyq sý tartylmaǵan. O basta Ablaket aýdanyndaǵy kóptegen úıdiń jaǵdaıy osyndaı edi. Keıin bárine birtindep ınjenerlik ınfraqurylym tartyldy. 2011 jyly kenttiń kommýnaldyq sharýashylyǵy túgeldeı jańǵyrtylǵanda osy 6 úı eskerýsiz qaldy. Qysta aýdany 32 sharshy metr páterdiń ózin jylytýǵa 4 tonnadan astam kómir jaǵamyz. Al elektr pesh ornatqandar jaryqqa aıyna 50 myń teńge tóleıdi. Buǵan deıin bir ret osy máseleni sheshý úshin qarjy bólingen, keıin sıyrquıymshaqtanyp ketti. Bıyl qaıta bólingenin estigen soń, sol keleńsizdik qaıtalanbas úshin oblys ákimine aryz joldadyq. Onyń ústine bizdiń úıler eshbir mekemeniń balansyna alynbaǵan, saıda sanymyz, qumda izimiz joq» - deıdi Nına Şýka.

Atalmysh úılerdi jylý magıstraline jalǵaý úshin jalpy uzyndyǵy 192 metr qubyr tartý qajet. Al úılerdiń ishine qubyrdy turǵyndar óz qarajattaryna  júrgizýi tıis.

«Mamyr aıynda qala ákimdigi qubyr tartý jumystaryn jobalaýǵa konkýrs jarııalaǵan bolatyn. Erteń konkýrstyń nátıjesi anyq bolady. Shilde aıynda barlyq qujattary maquldaýdan ótip, tamyzda qurylys bastalady. Qyrkúıekte úıdiń irgesine deıin qubyr tartylady. Ony kútip otyrmaı, ózderińiz úı ishindegi jelini tartyp qoıýlaryńyz qajet. 192 metr qubyr  júrgizý úshin 20 mln teńgeden astam qarjy kerek degen esep bar. Ol soma qala bıýdjetinen bólinedi»,- dedi Danıal Ahmetov.