Óskemende 7 jasar ógeı balasyn aıaýsyz soqqyǵa jyqqan er adam ustaldy
ÓSKEMEN. QazAqparat – Óskemen qalasynda 7 jasar balany soqqyǵa jyqqan er adam ustaldy, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, medıtsınalyq mekemege mıy shaıqalyp, bet-aýzy jaralanǵan bala jetkizilgen.
Polıtsııa qyzmetkerleri atalǵan fakti boıynsha birden tekserý júrgizdi. Anyqtalǵandaı, balany anasynyń 42 jastaǵy azamattyq nekedegi kúıeýi uryp-soqqan.
«Bul otbasynda kámeletke tolmaǵan tórt bala bar. Alaıda ekeýi resmı túrde nekege turmaǵan. 6 jeltoqsanda balalardyń anasy jumysqa ketken. Al jumys istemeıtin er adam úıde qaldy. Kesh oralǵan áıel ulynyń jaraqattaryn kórip, ýchaskelik polıtsııa ınspektoryna habarlasqan. Bala dereý aýrýhanaǵa jetkizildi», - delingen aqparatta.
Tergeý barysynda anasy aıtqandaı, kúıeýi sol kezde mas bolǵan.
Qazirgi ýaqytta er adamǵa qatysty qorǵaý uıǵarymy shyǵarylyp, QR ÁQBtK-niń 73-babyna sáıkes ákimshilik hattama toltyryldy.
