Óskemende 7 balasyna alıment tólemegen áıelge qatysty qylmystyq is qozǵaldy

ÓSKEMEN. KAZINFORM – Óskemen qalasynda áıel adamnyń 7 balasy aldyndaǵy alıment boıynsha qaryzy 9 mln teńgege jetken. 

ShQO polıtsııa departamenti baspasóz qyzmetiniń málimetine súıensek, polıtsııaǵa áleýmettik kómekke muqtaj balalardy qoldaý ortalyǵynyń dırektory júgingen.

Óz sózinde ol 42 jastaǵy Óskemen turǵynynyń sot sheshimimen belgilengen alıment tóleý mindetin oryndamaı kele jatqanyn jetkizdi. 

- Áıel adamnyń 7 kámeletke tolmaǵan balasy ortalyqta tárbıelenip jatyr. Onyń alıment boıynsha qaryzy 9 mıllıon teńgeden asqan. Tártip saqshylary atalǵan fakti boıynsha qylmystyq is qozǵady. Qazirgi ýaqytta tergeý amaldary júrgizilýde, - dep habarlady vedomstvo ókilderi. 

Osy rette, polıtsııa alıment tóleýden jaltarǵandar qylmystyq jaýapkershilikke tartylatynyn eskertti. 

Eske salsaq, buǵan deıin BQO-da alımentten jaltarǵan qos azamattyǵy bar er adamǵa jarty mln teńge aıyppul salynǵany habarlanǵan.