Óskemende 600 oryndyq jataqhana salynady
ÓSKEMEN. QazAqparat - Sońǵy tórt jylda memlekettiń «Serpin» baǵdarlamasy boıynsha ońtústik oblystardan shyǵysqa kelip bilim alyp jatqan stýdentterdiń sany kúrt artty, dep habarlaıdy «Habar 24».
Sondyqtan aldaǵy birneshe jylda olar úshin óńirde 11 jataqhana salynady. Sársen Amanjolov atyndaǵy Shyǵys Qazaqstan memlekettik ýnıversıteti aldaǵy jyly 600 oryndyq jataqhananyń qurylysyn bastamaq. Qazir bul oqý ornynda 5 myńǵa jýyq jas oqyp jatsa, olardyń 1700-den astamy jataqhanada turady. Jyl sanap stýdentterdiń de sany artyp keledi. Jańadan boı kóteretin jataqhananyń jobasy men tehnıkalyq negizdemesi jasalyp, ınfraqurylym da tartylyp qoıǵan. Qazir ýnıversıtet basshylyǵy stýdentter úıin salatyn ınvestor izdep jatyr. Al ǵımarat memlekettik jáne jekemenshik negizde boı kóteredi.
«Ózimizdiń ýnıversıtettegi kásibı baǵdar jumysyn Elbasynyń tapsyrmasyna sáıkes qarqyndy júzege asyryp jatyrmyz. Shetelderge ketý jaǵdaıy azaıyp kele jatyr. Sondyqtan da barlyq stýdentter Óskemen qalasynda qalǵysy keledi. Al olardy biz jataqhanamen qamtamasyz etý maqsatynda qosymsha 600 oryndyq jataqhana salýdy kózdep otyrmyz. Ol úshin arnaıy tehnıkalyq sharttardyń bári jasaldy. Barlyǵy da daıyn. Qazirgi tańda qurylysshy fırmalarmen jumys jasap jatyrmyz»,- S.Amanjolov atyndaǵy ShQMÝ rektory - Muhtar Tólegen.
