Óskemende 600-den astam adam balasyna 1 mlrd teńge alıment tólemegen

ÓSKEMEN. KAZINFORM – Óskemen qalasynda balalardyń paıdasyna 171 mln teńge alıment óndirildi.

Qalalyq prokýratýra baspasóz qyzmetiniń málimetine súıensek, búginde 6 myńnan astam alıment óndirý týraly sot sheshimi oryndalyp jatyr. Tólemniń ýaqtyly túsýine 8 myńǵa jýyq bala úmit artyp otyr.

Alaıda áli kúnge deıin keıbir ata-analar tólemnen jaltaryp júr. Búginde Óskemende osyndaı 649 adam bar. Olardyń alıment boıynsha bereshegi 1 mlrd teńgeden asady.

- Óskemen qalasynyń prokýratýrasy alıment ala almaı jatqan balalardyń quqyqtaryn qorǵaý jumysyn kúsheıtti. Boryshkerlerdiń avtokólikteri tárkilenip, olardyń derekteri «Potok» jáne «Mergen» júıelerine engizildi. Júıeli alıment tólemeýshiler ákimshilik jáne qylmystyq jaýapkershilikke tartylyp jatyr, - delingen aqparatta.

Resmı jumysy joq boryshkerler jumyspen qamtý ortalyqtaryna jiberilip, olardyń jumysqa ornalasýy turaqty baqylaýǵa alynǵan. 

- Sonymen qatar jeke sot oryndaýshylary jiti qadaǵalaýda. Tekserýler qorytyndysy boıynsha 25 sot oryndaýshysy tártiptik jaýapkershilikke tartyldy. Jalpy jyl basynan beri balalardyń paıdasyna 171 mln teńge óndirildi, - delingen málimette. 

Eske salsaq, osyǵan deıin ShQO-da stýdent qyz alıment tólemegen ákesin sotqa bergeni habarlanǵan.