Óskemende 5 jasar qyzyna 3 mln teńge alıment qaryzy bar áıel anyqtaldy
ÓSKEMEN. QazAqparat – Óskemen qalasynda turatyn áıel balasyna 3 mln teńge alıment tólemegen, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, kóshi-qon qyzmetine jeke sot oryndaýshysynan 2018 jylǵy naýryzdan beri 5 jasar qyzyna alıment tólemegen áıelge izdestirý jarııalaý týraly qaýly kelip túsken.
«39 jastaǵy azamatshany tabý úshin jedel-izdestirý sharalary qolǵa alyndy. Tártip saqshylary onyń qaıda ekenin bir kún ishinde anyqtady. Áıel adam osy jyldar boıy resmı túrde jumysqa ornalaspaǵanyn, sol sebepti alıment tólemegenin aıtyp aqtalǵan. Qazirgi ýaqytta onyń qaryzy 3 000 000 teńgeden asyp otyr. Endi aqshany óndirip alýmen sot oryndaýshylary aınalysady», - delingen aqparatta.
Jyl basynan beri Shyǵys Qazaqstan oblysynda balasyna alıment tólemegen 120-dan astam adam anyqtaldy.
