Óskemende 5 jasar qyzdy basyp ketken avtobýs júrgizýshisy sottaldy

ÓSKEMEN. QazAqparat – Óskemen qalasynda 5 jasar qyzdy qaǵyp, mert qylǵan avtobýs júrgizýshisine sot úkimi shyqty, dep habarlaıdy QazAqparat tilshisi.

Jol-kólik oqıǵasy Bajov kóshesinde bolǵan.

Qoǵamdyq kólik júrgizýshisi jolaýshylardy aıaldamadan túsirgen kezde qaýipsizdik talaptaryn saqtamaı, 5 jasar qyzdy qaǵyp ketti.

Sonyń saldarynan ol sol jerde mert bolǵan.

Atalǵan fakti boıynsha tártip saqshylary QR Qylmystyq Kodeksiniń 345-baby 3-bóligine sáıkes tergeý amaldaryn júrgizgen.

Tergeý aıaqtalǵan soń is Óskemen qalalyq №2 sotynda qaraldy.

«Sot barysynda avtobýs júrgizýshisi kesteden keshigip bara jatqany úshin kelesi aıaldamaǵa asyqqanyn aıtty. Artqy aınaǵa qaramaǵan ol jolaýshylardyń tolyq túsip bolǵanyna kóz jetkizbesten esikti jaýyp, ketip qaldy. Al aıaǵy esikke qysylǵan qyz jerge qulap túsken. Sol kezde ony avtobýs taptap ketti», - delingen sot úkiminde.

Sot sheshimimen avtobýs júrgizýshisi 2 jarym jylǵa bas bostandyǵynan aıyryldy.

Sottalǵan azamat qylmysty abaısyzda jasaǵandyqtan jazasyn qaýipsizdigi tómen túzetý mekemesinde óteıdi.