Óskemende 5 myń, Aqtóbede 30 myń oryn: Eldiń 8 qalasynda fýtbol stadıondary salynady

ASTANA. KAZINFORM — Týrızm jáne sport mınıstri Erbol Myrzabosynov elde fýtbol ınfraqurylymy qalaı jańǵyrtylatynyn málim etti.

Onyń sózinshe, qazirgi ýaqytta 8 stadıonnyń qurylysyna baılanysty jumystar júrgizilýde. Onyń ishinde Qyzylorda qalasynda trıbýnalary bar jańa stadıon salynyp jatyr.

— Batys Qazaqstan oblysynyń ortalyǵy Oral qalasynda P. Atoıan atyndaǵy stadıonnyń jobalyq-smetalyq qujattamasy jeke ınvestıtsııalar esebinen ázirlenip, memlekettik saraptamaǵa jiberilgen. Astanada Q. Munaıtpasov atyndaǵy stadıonnyń jobasy memlekettik saraptamanyń oń qorytyndysyn aldy. Shymkentte, Semeıde jáne Aqtaýda jańa stadıondar salý úshin jobalyq-smetalyq qujattama ázirlenýde. Sonymen qatar, Óskemen qalasynda 5 myń oryndyq jabyq stadıon salý úshin jer ýchaskesi belgilengen. Bul joba Memleket basshysynyń tapsyrmasy aıasynda júzege asyrylýda. Sondaı-aq, Aqtóbe qalasynda 30 myń oryndyq stadıon salý josparlanǵan, — dedi mınıstr.

Qazir elimizde 28 negizgi stadıon jumys istep tur. Mınıstr atap ótkendeı, onyń ınfraqurylymyn damytý úshin taǵy qosymsha taǵy 5 jańa stadıon salý kerek.

Buǵan deıin boryshker lýdomandardy JSN arqyly anyqtaý tetigi engizilýi múmkin ekeni aıtyldy.

Sonymen qatar úsh oblysta tek sheteldikterge arnalǵan kazınolar ashylatyny anyqtaldy.