Óskemende 47 jastaǵy áıel sýǵa batyp ketti
ÓSKEMEN. QazAqparat – Óskemen qalasynda 47 jastaǵy áıel sýǵa batyp ketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 8 tamyz kúni shamamen saǵat 21.00-de Abaı dańǵyly mańaıyndaǵy Úlbi ózeninde 1973 jyly týǵan áıel batyp ketti.
«Belgili bolǵandaı, azamatsha shomylýǵa tyıym salynǵan, aǵyny qatty sý aıdynyna barǵan. Áıel adam óz kúshin durys eseptemeýdiń saldarynan kóz jumdy. Oqıǵa sanaýly mınýttarda bolǵan, ol tipti aıqaılap ta úlgermegen», - dep habarlady vedomstvo ókilderi.
Jedel-qutqarý jasaǵynyń qyzmetkerleri sol jerge kelgen soń jaǵalaýǵa tekserý júrgizdi. Kóp uzamaı sýǵa ketken áıeldiń denesi tabyldy.
