Óskemende 40 órt sóndirýshi qoımany sharpyǵan jalynmen kúresti
ÓSKEMEN. QazAqparat – Óskemen qalasynda qaraýsyz qoımalardyń birinen órt shyqqan, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 14 jeltoqsan kúni saǵat 08.43 kezinde Moldybaev kóshesindegi qoımany qyzyl jalyn sharpydy.
Tilsiz jaýdyń jalpy aýmaǵy 200 sharshy metrge jetken. Oqıǵa ornyna birden jetken órt sóndirýshiler otty aýyzdyqtaýǵa kiristi.
«Órt shatyrdyń aǵash qurylymdaryna jáne qoımanyń ishindegi jıhazdarǵa jaıyldy. Zardap shekken eshkim joq» dep habarlady vedomstvo ókilderi.
Aıta keteıik, órtti sóndirýge 9 tehnıka men jeke quramnan 40 adam jumyldyrylǵan.
