Óskemende 4 jigit oıyn termınaldaryn zańsyz ornatyp paıdaǵa kenelgen
ASTANA. QazAqparat - Óskemende 20 shaqty dúkenge oıyn termınaldaryn zańsyz ornalastyryp, ájeptáýir paıda kórgen 4 kúdiktige qatysty sot protsesi aıaqtaldy, dep habarlaıdy «QazAqparat» HAA tilshisi.
2016 jyldyń 9 sáýirinde QR «Lotereıalar týraly» týraly zańyna ózgeris engizilip, zań lıtsenzııa ıelerine alty aı ýaqyttyń ishinde tolyqtaı syıaqy qoryn oınatyp, utqandarǵa aqshasyn berýge mindettelgen. ıAǵnı, alty aıdan keıin lıtsenzııanyń kúshi joıylǵan. Alaıda sol jyldyń qarasha aıyna qaraı, sottalýshylar oıyn termınaldaryn jabýdyń ornyna jumystaryn «tyń tynyspen» bastaıdy. Atap aıtqanda, jigitterdiń biri oıyn termınaldaryn qoıatyn saýda núktesin izdese, ekinshisi ınkassatsııa jumysyn iske asyrǵan. Úshinshisi bankten shot ashyp, sol kúıi anyqtalmaı ketken adamnyń esebine oıyn bıznesinen túsken aqshany aýdaryp otyrǵan.
Oıyn termınalyna qunyqqan adamdar 200 teńgeden 20000 teńgege deıin aqsha salyp, san soqsa, sottalýshylar aıtarlyqtaı paıda kórgen. Birshama ýaqyt jumystary «qyzyp» turǵanymen, osy jyldyń shildesinde tórt aıyptalýshyǵa sot aldynda jaýap berýge týra keldi.
Sotta aıyptalýshylardyń tórteýi de taǵylǵan aıyptarmen kelisip, kinásin moıyndaý túrinde protsessýaldyq kelisimge keldi. Sot úkimimen olardyń barlyǵyna 3 jyl 6 aı merzimge bas bostandyǵyn shekteý jazasy taǵaıyndaldy.
