Óskemende 4 jasar bala tórtinshi qabattan qulap ketti

ÓSKEMEN. QazAqparat – Óskemen qalasynda 4 jasar bala tórtinshi qabattaǵy balkonnan qulap ketti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, oqıǵa 12 shilde kúni tańerteń Krylov kóshesinde bolǵan.

«Balanyń anasy úıde boldy. Oınap júrgen bala balkonǵa shyǵyp, tómenge qulap ketti», - delingen aqparatta.

4 jasar bala jaǵdaıy ortasha aýyr deńgeıde aýrýhanaǵa jetkizilgen.

«Ol bas-mı jaraqaty dıagnozymen jansaqtaý bóliminen neırohırýrgııa bólimine aýystyryldy. Balanyń bilegi synǵandyqtan ota jasaýǵa týra keldi. Uıqysy, tábeti buzylmaǵan. Dál qazirgi ýaqytta onyń jaǵdaıy jaqsy», - dep habarlady oblystyq Densaýlyq saqtaý basqarmasynyń baspasóz qyzmeti.