Óskemende 4 memleketti jalǵaıtyn termınal ashyldy
ASTANA. QazAqparat - Óskemen áýejaıynda jańa termınaldyń qurylysy aıaqtaldy. Bul tórt memlekettiń ıntegratsııasyn damytýdaǵy alǵa basqan taǵy bir qadam, dep habarlaıdy Altaynews .
Oblys ortalyǵyndaǵy halyqaralyq áýejaıynda jańa ushyp kelý termınalynyń qurylysy aıaqtaldy. Termınaldyń saǵatyna 200 jolaýshyny qabyldaýǵa áleýeti bar.
«Bul obektini iske qosý Shyǵys Qazaqstan úshin óte mańyzdy, óıtkeni oblysymyz Qazaqstan, Reseı, Qytaı jáne Monǵolııa sııaqty elder arasyn jalǵap turǵan kópir ispeti. Bul tórt memlekettiń ıntegratsııasyn damytýdaǵy alǵa basqan taǵy bir qadam, - dedi termınaldyń ashylý saltanatyna qatysqan oblys ákimi Danıal Ahmetov.
Sonymen qatar oblys ákimi qurylys jumystaryn merziminen buryn aıaqtaǵan jumysshylarǵa alǵysyn bildirip, el Táýelsizdigi kúni merekesimen quttyqtady.
Jalpy quny 554,5 mıllıon teńgeni quraıtyn termınal qurylysynyń jumystary 2016 jyldyń tamyz aıynda bastalǵan bolatyn. Jańa termınaldyń negizgi tehnologııalyq bólemeleri - ushyp kelý jáne júk tapsyrý zaldary zamanaýı talaptarǵa saı jabdyqtalǵan. Onda júk qabyldaý jáne beıne baqylaý júıesi, sondaı-aq ana men bala bólmesi bar. Termınaldyń jalpy aýdany 1128 sharshy metrdi quraıdy.
Qazirgi ýaqytta Óskemen áýejaıy kúnine 5 reıstik ushý qarqyndylyǵy bar 2 klasstyq sanatqa ıe. Bolashaqta júk termınalyn salý, ushý-qoný jolaǵyn, áýe kemelerine arnalǵan turaqtardy jáne ýaqytsha júk saqtaý qoımasyn qalpyna keltirý máseleleri qarastyrylýda.
