Óskemende 4,3 mln teńge jymqyrǵan esepshi ustaldy

ÓSKEMEN. QazAqparat – Óskemen qalasynda 4,3 mln teńge jymqyrǵan esepshi ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, «102» jedel arnasyna qaladaǵy JShS-lardyń biriniń basshysy habarlasty.

Óz sózinde ol kásiporynnyń burynǵy esepshisi paıda tabý maqsatta qyzmettik jaǵdaıyn paıdalanyp, aqsha jymqyrǵanyn jetkizdi.

«Sonyń saldarynan JShS-ǵa 4 300 000 teńgeden astam materıaldyq zalal keltirilgen. Jedel-izdestirý sharalaryn júrgizgen krımınaldyq polıtsııa qyzmetkerleri 31 jastaǵy kúdiktini ustady. Jaýap alý kezinde áıel adam óz kinásin moıyndady», - dep habarlady vedomstvo ókilderi.

Qazirgi ýaqytta ol qolhatpen bosatyldy.

Atalǵan fakti boıynsha QR QK-niń 189-baby 2-bóligine (senip tapsyrylǵan bóten múlikti ıemdený nemese ysyrap etý) sáıkes sotqa deıingi tergeý amaldary júrgizilip jatyr.