Óskemende 31 úıdi sý basty
ÓSKEMEN. QazAqparat. Óskemende saıajaı qoǵamdastyǵyndaǵy 31 úıdi sý basty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, aýa temperatýrasynyń kúrt jylynýyna baılanysty Ablaketka ózenindegi sý deńgeıi bir táýlikte 73 sm-ge jetti. Osynyń saldarynan Óskemendegi «Solnechnaıa dolına» saıajaı qoǵamdastyǵyndaǵy úılerdi sý basqan.
«Qutqarýshylar men jergilikti atqarýshy organdardyń qyzmetkerleri qazirgi jaǵdaıdy muqııat zerdeledi. Atalǵan qoǵamdastyqta 226 saıajaı ýchaskesi bar. Onyń 31-in sý basty. Bul úılerde eshkim turyp jatqan joq», - dep habarlady vedomstvo ókilderi.
Saıajaı qoǵamdastyǵyndaǵy tek eki úıde birneshe adam turady. Bul úılerdi sý baspaǵan. Otbasylardyń biri ýaqytsha turǵylyqty ornyn aýystyrdy. Ekinshi úı ıeleri evakýatsııalaýdan bas tartqan. TJD men qala ákimdigi jaǵdaıdy jiti baqylaýda.
