Óskemende 3 jasar bala besinshi qabattan qulap kóz jumdy

ÓSKEMEN. QazAqparat – Óskemen qalasynda 3 jasar bala besinshi qabattaǵy terezeden qulap mert boldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, qaıǵyly oqıǵa 5 maýsym kúni qala irgesindegi Kúlenov kentinde bolǵan.

«3 jasar bala besinshi qabattyń terezesinen qulap ketip, birden sol jerde kóz jumdy. Qazirgi ýaqytta oqıǵanyń barlyq mán-jaıy anyqtalyp jatyr. Sotqa deıingi tergeý amaldary júrgizilýde. Ózge aqparat QR Qylmystyq is júrgizý kodeksiniń 201-babyna sáıkes jarııa etilýge jatpaıdy», - delingen aqparatta.

Osy rette, oblystyq Tótenshe jaǵdaılar departamenti bala terezeden qulap ketpes úshin ne isteý kerektigin túsindirdi.

«Qaıǵyly oqıǵa ata-analar úlken balalaryna kishilerin qaraýdy tapsyrǵan kezde bolady. Keıbireýler tipti bes jasar balasyna bir jasar búldirshinge bas-kóz bolýdy tapsyryp jatady. Bul múlde durys emes. Bala eresekter sııaqty jaýapkershilikti sezine almaıdy. Keıbir ata-analar kishkentaı balalaryn kóshege, qustarǵa, kólikterge qaratý, ákesine nemese sheshesine qol bulǵaý úshin tereze aldyna ózderi shyǵarady. Sonyń saldarynan bala bıiktiktiń qanshalyqty qaýipti ekenin túsinbeıdi», - deıdi ShQO TJD psıhology Svetlana Andrýsenko.

Balalar moskıt toryna súıenip, terezeden qulap ketýi múmkin. Shybyr-shirkeıdi úıge kirgizbeıtin moskıt tor eshqashan balalarǵa qorǵan bola almaıdy. Kerisinshe ondaı tor qaıǵyly jaǵdaıǵa sebepker bolady. Óıtkeni bala ózin qaýipsiz sezinedi de oǵan súıenedi.

Qaıǵyly oqıǵanyń aldyn alǵyńyz kelse:

- balalardy qaraýsyz qaldyrmańyz;

- páter terezelerine arnaıy qorǵanys quraldaryn ornatyńyz;

- bala ózdiginen asha almaıtyndaı etip tereze tutqasyn qulyptańyz;

- balanyń tereze aldyna shyǵýyna jol bermes úshin jıhazdyń barlyq túrin terezelerden alysqa qoıyńyz;

- balany tereze aldyna shyǵaryp, kóshede ne bolyp jatqanyn kórsetýge úıretpeńiz. Ol siz joqta sony qaıtalaýy múmkin;

- balalarǵa eresekterdiń qaraýynsyz balkonǵa shyǵýǵa ruqsat bermeńiz.