Óskemende 3 jasar bala altynshy qabattan qulap ketti

ÓSKEMEN. KAZINFORM — Óskemen qalasynda altynshy qabattyń terezesinen qulap ketken bala aýrýhanaǵa jetkizildi.

ShQO Polıtsııa departamenti baspasóz qyzmetiniń málimetine súıensek, oqıǵa Karbyshev kóshesindegi kópqabatty úılerdiń birinde bolǵan. 3 jasar balanyń qalaı qulap ketkeni ázirge belgisiz. 

— 102 jedel arnasyna balanyń bıikten qulaǵany týraly habar tústi. Belgili bolǵandaı, bala altynshy qabattaǵy páter terezesinen tómende ornalasqan dámhananyń shatyryna qulap túsken. Sol jerge birden tártip saqshylary men jedel qyzmetter kelip jetti. Bala aýrýhanaǵa jatqyzyldy, — delingen aqparatta.

Qazirgi ýaqytta tártip saqshylary oqıǵanyń mán-jaıyn anyqtap jatyr. 
Eske salsaq, osyǵan deıin Aqmola oblysynda naızaǵaı soǵyp, bir bala qaza tapty, ekinshisi jaraqat alǵany habarlanǵan.