Óskemende 3-qabattan qulaǵaly turǵan sábı qutqaryldy
ÓSKEMEN. QazAqparat - Óskemendik saqshylar Rashıd Soltanǵazın men Baýyrjan Rızabekov úshinshi qabattyń terezesinen qulaıyn dep turǵan balany qutqardy, dep habarlaıdy QazAqparat tilshisi.
Oblystyq ishki ister departamentiniń baspasóz qyzmetiniń habarlaýynsha, polıtsııa serjanttary Táýelsizdik dańǵylyndaǵy aýlalardyń birinde jınalyp turǵandardy kórgen.
Kópqabatty úıdiń úshinshi qabatynda tereze jaqtaýynda turǵan balanyń ómiri qyl ústinde ekenin ańǵarǵan saqshylar erikti turǵyndarmen birge kórshi páterdiń terezesinen esigi ishten jabylyp turǵan páterge túsip, sábıdi qutqaryp qalǵan. «Balany jalǵyz qamap ketken úı ıelerine túsindirý jumystary júrgizildi. Qutqarylǵan balanyń jasy beste ekeni anyqtaldy» - delingen baspasóz habarlamasynda.
