Óskemende 28 jastaǵy júrgizýshi esirtkige eltigen kúıi avtobýs aıdaǵan

ÓSKEMEN. QazAqparat – Óskemende polıtseıler esirtki qabyldaǵan avtobýs júrgizýshisin kólik aıdaýdan shettetti, dep habarlaıdy QazAqparat Shyǵys Qazaqstan oblysy polıtsııa departamentiniń baspasóz qyzmetine silteme jasap.

Búgin patrýl polıtsııa batalony men ShQO polıtsııa departamentiniń jergilikti polıtsııa qyzmeti basqarmasynyń qyzmetkerleri «Avtobýs» jedel aldyn alý sharasy aıasyndaǵy reıd kezinde esirtki qabyldap, kólik aıdaǵan júrgizýshini ustady.

Kýálandyrý nátıjesinde qala ishinde turaqty túrde jolaýshy tasymaldaýmen aınalysqan 28 jastaǵy shaǵyn avtobýs júrgizýshisiniń kannabınoıd qabyldaǵany anyqtaldy.

Júrgizýshige qatysty QR Ákimshilik quqyq buzý týraly kodeksiniń 608-baby 1-bóligine sáıkes ákimshilik hattama toltyryldy.

Aıta keteıik, 10-17 qazan aralyǵynda oblys aýmaǵynda «Avtobýs» jedel aldyn alý sharasy ótkizilip jatyr.