Óskemende 25 jastaǵy jigit saıajaıyn esirtki zerhanasyna aınaldyrǵan

ÓSKEMEN. KAZINFORM – Óskemen qalasynda saıajaıda esirtki ósirip kelgen er adam ustaldy.

Polıtsııa qyzmetkerleri «Qarasora» jedel aldyn alý sharasy barysynda 25 jastaǵy óskemendikti ustady. 

«Er adam óz úıiniń saıajaıynda tyıym salynǵan ósimdikterdi ósirýge arnalǵan, arnaıy shamdarmen, jeldetkishtermen jáne termometrlermen jabdyqtalǵan zerthana qurǵan. Tártip saqshylary oqıǵa ornynan qarasora butasyn jáne ósimdik tektes zattardy tárkiledi», - delingen ShQO Polıtsııa departamenti taratqan aqparatta.

Tárkilengen qarasoranyń salmaǵy 600 gramnan, marıhýananyń salmaǵy 750 gramnan asady.

Kúdiktige qatysty esirtki quraldaryn, psıhotroptyq zattardy, sol tektesterdi, prekýrsorlardy ótkizý maqsatynsyz zańsyz ósirý baby boıynsha qylmystyq is qozǵaldy.

Eske salsaq, buǵan deıin Óskemen qalasyndaǵy dámhana aldyna múrde keıpindegi mýlıajdy ilip qoıǵan kásipkerge aıyppul salynǵany habarlanǵan.