Óskemende 22 jastaǵy «balger» zeınetkerlerdi tonap kelgen
ÓSKEMEN. QazAqparat - Shyǵysqazaqstandyq krımınaldyq polıtsııa mamandary Óskemen qalasy men birneshe aýdanda alaıaqtyq jasaǵan azamatshany ustady. Kúdikti egde tartqan adamdardyń úıine aldap kirip, baǵaly zattaryn urlap ketip otyrǵan, dep habarlaıdy QazAqparat tilshisi.
Sáýir aıynyń basynda Glýbokoe aýdanynyń 84 jastaǵy turǵyny polıtsııaǵa júgingen. Beıtanys boıjetken onyń úıine aldap kirip, aqshasyn qoldy etken. Sotqa deıingi izdestirý sharalary kezinde krımınaldyq polıtsııa qyzmetkerleri Óskemenniń 22 jastaǵy turǵynyn ustady.
Keıin bul azamatsha osyǵan uqsas birneshe qylmys jasaǵany belgili bolǵan. Ulan aýdany men Óskemen qalasynda da «sháli satýshy» qyzdan zardap shekkender shyqqan.
Kúdikti ózin keıýanalarǵa sháli satýshy retinde tanystyryp, senim uıalatqan soń, úıine enip, baǵaly zattardy urlap otyrǵan. Áńgime arasynda óziniń «qarǵys qaıtarý», «úıdiń aýrasyn tazartý» sııaqty rásimderdi oryndaıtyn qasıeti bar ekenin aıtyp, qarııalardyń basyn aınaldyrýmen bolǵan. Úıdegi jaǵymsyz energııa birjola shyǵý úshin duǵa oqylǵan shálige qolda bar aqshanyń bárin salý kerek bolǵan. Onymen qoımaı, rásimnen keıin aqsha oralǵan shálini 1-2 saǵat kóleminde ońasha qaldyrýdy tapsyrǵan. Shálige oralǵan aqshanyń qoldy bolǵanyn aldanǵan adamdar kúdikti úıden ketken soń ǵana ańǵarǵan. Osyndaı jolmen ol úsh keıýanany aldap, barlyǵy 500 myń teńgededen astam aqshany qaltasyna basqan.
Kúdiktige qarsy «Alaıaqtyq» baby boıynsha qylmystyq is qozǵaldy.
