Óskemende 200-ge jýyq jas kúzde áskerge shaqyrylady

ÓSKEMEN. QazAqparat – Óskemen qalasynda kúzgi áskerge shaqyrý naýqany júrgizilýde, dep habarlaıdy QazAqparat tilshisi.

Óskemen garnızony baspasóz qyzmetiniń málimetine súıensek, bıylǵy kúzde eki júzge jýyq jigit shaharǵa merzimdi áskerı qyzmetke shaqyrylatyn bolady.

Áskerge shaqyrylýshylardyń alǵashqy toby memleket shekarasyn qorǵaýǵa attanady. Odan keıin Qarýly Kúshterdiń áskerı bólimderine, Memlekettik kúzet qyzmeti men QR Ulttyq ulanyna jasaqtalady.

«Áskerge shaqyrý týraly SMS habarlama alyp,qalalyq Qorǵanys isteri basqarmasynda medıtsınalyq tekserýden ótýge keldim. Densaýlyǵyma esh shaǵymym joq. Bolashaqta Qazaqstan Qarýly Kúshteriniń qatarynda, desanttyq shabýyldaý áskerlerinde qyzmet etkim keledi», – dedi áskerge shaqyrylýshy Álınur Zańǵarov.

Osy jyldan bastap elicense.kz. portaly arqyly onlaın rejımde áskerge shaqyrylýdan bosatý jáne keıinge qaldyrýǵa ótinish berýge bolady. Shaqyrý komıssııasy ótinishti qosa berilgen qujattarmen qarap, qorytyndy shyǵarady.

Aıta keteıik, kúzgi áskerge shaqyrý naýqany jeltoqsan aıynyń sońyna deıin jalǵasady.