Óskemende 20 myń tonna qoqys óńdeıtin zaýyt salynady
ÓSKEMEN. QazAqparat - Óskemende qoqys óńdeıtin zaýyt salynady. Shyǵys Qazaqstan oblysynyń ákimi Danıal Ahmetov energetıka jáne turǵyn úı-kommýnaldyq sharýashylyq basqarmasyna osyndaı tapsyrma berdi, dep habarlaıdy QazAqparat.
Joldaýdy talqylaýǵa arnalǵan májiliste D.Ahmetov Elbasy júktegen 10 mindettiń oblysta qalaı júzege asatynyn baıandady. Turmystyq qaldyqtardy ýtılızatsııalaý isine bıznes nysandaryn tartý maqsatynda oblys ortalyǵynda qoqys óńdeıtin zaýyt salynbaq.
«Jalpy oblysta 26 energetıkalyq joba júzege asady. Qatty qaldyqtardy suryptap tógý isine qarqyn qosamyz. Óskemen, Semeı, Zyrıan qalalary birinshi bolyp ózge aýdan, qalalarǵa úlgi kórsetýi tıis. Oblys ortalyǵynda qýattylyǵy 20 myń tonnalyq qaldyq óńdeıtin zaýyt salý kózdelýde.- dedi D.Ahmetov.
2019 jyldan bastap turmystyq qatty qaldyqtyń 17 túrin qoqys polıgondaryna kómýge tyıym salynýy múmkin. Kómýge tyıym salynǵan qaldyqtardyń ishinde karton qoraptar, plastık pen plastmassadan jasalǵan buıymdar, shyny ydystar, qurylys qaldyqtary bar.
Ázirge óńirdegi qaldyq suryptaýmen aınalysatyn kásipkerler jınaǵan «shıkizatyn» Reseıdiń Omby qalasy men Almatyǵa ótkizip keledi.
«Óskemende plastık jáne platmassa qaldyqtaryn jınaýmen aınalysatyn úsh mekeme bar. Plastmassa qaldyqtaryn qaıta óńdep, qurylys buıymdaryn shyǵaratyn tseh bar», - deıdi «Ekologııalyq qaýipsizdik ortalyǵy» JShS dırektory Gennadıı Koreshkov.
Solardyń biri - «Ekovostoklıder» JShS bir jyldyń ishinde 26 ga jerge ekologııalyq dúńgirshek ornatypty. Seriktestik bolashaqta olardyń sanyn 600-ge jetkizbekshi. Al qala bıligi bıyl 500 alańǵa 1500 ekologııalyq dúńgirshek ornatpaqshy. Onyń 500-i qaǵaz qaldyqtaryn, 500-i plastık qaldyqtaryn, taǵy 500-i shyny qaldyqtaryn tógýge arnalady. Inertti qaldyqtar úshin qosymsha 50 dúńgirshek jáne bólinýi múmkin.
Esimjan Naqtybaıuly
