Óskemende 2 jasar bala besinshi qabattan qulap ketti
ASTANA. QazAqparat - Óskemen qalasyndaǵy kóp qabatty úılerdiń birinde anasy kenje balasyn tamaqtandyryp otyrǵanda eki jasar uly besinshi qabattyń terezesinen qulap túsken. Qazir bala jan saqtaý bólmesinde, dep habarlaıdy altaynews.kz .
Búldirshin ne bary 2 jas 11 aıda eken. Dárigerlerdiń aıtýynsha, onyń joly bolǵysh, sebebi ádette mundaı jastaǵy balalar terezeden qulaǵan kezde jerge basymen soǵylady, al bul jaǵdaıda ol aldymen oń aıaǵymen keıin tolyq oń jaǵymen jerge tústi. Osynyń arqasynda aman qaldy.
«Patsıenttiń jaǵdaıy óte aýyr, biraq turaqty. Ortan jiliginiń synýy, kókirek qýysynyń zaqymdanýy men mıdyń shaıqalýy sebebinen qazir bala travmalyq shok jaǵdaıynda. Alaıda ortan jilikti sanamaǵanda onyń qańqasy bútin», - dedi Ana men bala ortalyǵynyń dırektory Sergeı Popov.
Óńirlik Ana men bala ortalyǵynyń málimdeýinshe, bul Óskemendegi birinshi oqıǵa emes. «Bıyl biz ata-analarǵa birneshe ret terezelerge erekshe nazar aýdaryp, balalardy qaraýsyz qaldyrmaý keregin eskertkenbiz. Ókinishke oraı sonda da bizdiń keńesterge barlyǵy qulaq asyp jatqan joq», - dedi Sergeı Popov.
