Óskemende 2 myńǵa jýyq kóshe shamy janbaı tur

ÓSKEMEN. KAZINFORM – Óskemen qalasynyń kóshelerinde ornatylǵan kóshe shamdarynyń ishinde 2 myńǵa jýyǵy janbaı tur. 

Qala turǵyndary arasynda kesh batqanda kósheleri qara túnekke malynatyndyǵyna shaǵymdanatyndar kóbeıip keledi. Osy máseleni sheshý úshin ne istelip jatqandyǵyn ákimdiktiń kóshelerdi jaryqtandyrý júıesin jańǵyrtý jónindegi jumys tobynyń jetekshisi Rınat Butajanov aıtyp berdi.

«Qazirgi tańda 11583 sham, 212 shaqyrym kabel aýystyrylyp, 11 syrtqy jaryqtandyrýdy basqarý shkaftary ornatylǵan. Degenmen, jańadan ornatylǵan shamdar tez isten shyǵady nemese múldem janbaıdy. Qalada barlyǵy eki myńǵa jýyq jumys istemeıtin sham bar. Shamdardyń janbaýynyń negizgi faktorlary – jelilerdiń tozýy, aýa raıy jaǵdaıy, jelilerdi salý kezinde jumystyń sapasyzdyǵy», - deıdi Rınat Butajanov.

Onyń aıtýynsha, jalpy Óskemende kóshelerdi jaryqtandyrý júıesin jańǵyrtý jobasy birneshe jyl buryn bastalǵan. Joba áli aıaqtalǵan joq.

«Eger Everlight Electronics Co kompanııasy óz mindettemelerin oryndasa, kemshilikter túzetiledi. Qazir qosalqy merdiger Digital Security qalpyna keltirý jumystaryn kúsheıtilgen rejımde júrgizýde. 2024 jyldyń sońyna deıin Óskemendegi kóshelerdi jaryqtandyrý júıelerin jańǵyrtý jobasyn aıaqtaýdy josparlap otyrmyz», - deıdi kóshelerdi jaryqtandyrý júıesin jańǵyrtý jónindegi jumys tobynyń jetekshisi.