BQO aýylynda elektr symynyń úzilýi saldarynan mal ólimi de tirkelip otyr
ORAL. KAZINFORM — Batys Qazaqstan oblysy Aqjaıyq aýdany Aqjol aýyldyq okrýgine qarasty eldi mekenderde elektr jaryǵy jıi sónedi.
Aqjol aýyldyq okrýginiń ákimi Bekbolat Qalenovtiń málim etkenindeı, okrýg ortalyǵy Іlbishinniń ózinde aýylishilik elektr jelisi tozǵan, symy úzilip, baǵanalary eskirip tur.
Onyń sózine qaraǵanda, jaýyn-shashyn kúnderi, qysqy mezgildegi boranda elektr jelisin turaqty tutyný qıyndyq týǵyzady. Symnyń úzilýi saldarynan ótken jyly 1 jylqy, bıyl alty qoı toqqa soǵylyp óldi.
Іlbishin aýylynda 14 kóshe, 1 223 turǵyn (363 aýla), 10 áleýmettik nysan bar. 2025-2026 jylǵy qys aılarynda jylytý maýsymyn qalypty ótkizý boıynsha másele boldy. Jaryq jıi sóndi. Chapaev aýdandyq elektr torabynyń qyzmetkerleri kúndiz-túni jumys istedi.
- Osy másele boıynsha aýdandyq, oblystyq qoǵamdyq keńeske, "Batys Qazaqstan aımaqtyq elektr jelilik kompanııasy» JShS-ǵa birneshe márte hat jazyldy. Hat nátıjesinde kompanııa Іlbishin qosalqy stanasynan Altyn orda kóshesine deıin 34 jańa baǵana ornatyp, 110 kvt jeli tartyp, jańa transformator ornatty. Nátıjesinde S.Datuly, Beıbitshilik, S.Seıfýllın, Naryn kóshelerindegi turǵyn úılerge jaryq turaqty ári qalypty berile bastady. Bul jumys 2025 jyldyń jeltoqsan aıynda bastalyp, bıylǵy maýsym aıynyń alǵashqy onkúndiginde aıaqtaldy. Endi osy jelige Qarshy jalpy orta bilim beretin mektebin qosý josparlanýda. Sondaı-aq aýdan ákimdigi "Batys Qazaqstan aımaqtyq elektr jelilik kompanııasymen" birlesip jaǵdaıy syn kótermeıtin birneshe kóshege kúrdeli jóndeý jumystaryn júrgizýdi oılastyrýda. Oǵan qosa qomaqty qarjyǵa Іlbishin aýylyndaǵy elektr jelisin tolyq rekonstrýktsııalaý jumystary kútilýde, - deıdi B.Qalenov.
Aýyl ákiminiń aıtýynsha, jeliler eskirgendikten, jaryqtyń sónýi saldarynan janyp ketken turmystyq tehnıkalar bar. Turǵyndardy osy mazalaıdy. Qys óz aldyna, jazdyń ystyq kúnderi de qıyndyq týǵyzý múmkin. Óıtkeni qazirgi tańda ár úıde bir-bir kondıtsıoner, 2-3 tońazytqysh bar. Tehnıkalardyń bári qosylǵanda, jeliler, qosalqy stansa bul salmaqty kótere almaı tur. Saldarynan Іlbishin qosalqy stansasy ajyrap, Іlbishinniń ózinde, okrýgke qarasty Qabyl, Tináli eldi mekenderinde jaryq sónedi.
Osy máselege baılanysty jaýap bergen BQO energetıka jáne turǵyn úı-kommýnaldyq sharýashylyq basqarmasynyń basshysy Beıimbet Mýsın atalmysh aýyl boıynsha "Batys Qazaqstan aımaqtyq elektr jelilik kompanııasy» JShS-men elektr jelilerin kúrdeli jóndeý qarastyrylyp jatqanyn jetkizdi.
- Ótken qysta Іlbishin aýylynda elektr jaryǵynyń jıi sóngeni ras. Mal óliminiń tirkelgeni týraly málimetter de bar. Elektr jelileri úzilgen kezde «Batys Qazaqstan elektr jelilik kompanııasymen» aqaýlardy joıyp, qalpyna keltirý jumystary júrgiziledi. Jalpy, oblys boıynsha kompanııanyń ár túrli kerneý deńgeılerindegi elektr jelileriniń jalpy uzyndyǵy 21 myń shaqyrymnan asady. 2025 jyldyń qorytyndysy boıynsha jelilerdiń tozý deńgeıi 75,4 paıyzǵa jetip, óńirdiń energetıkalyq ınfraqurylymyndaǵy negizgi máselelerdiń birine aınalyp otyr, - dedi B.Mýsın.
Basqarma málimeti boıynsha oblystyń qosalqy stantsııalarynyń qolda bar bos elektr qýaty – 315,5 MVt. Onyń ishinde Oral qalasy boıynsha – 110 MVt, aýdandarda – 205,5 MVt. Bul kórsetkish óńirde jańa óndiristik nysandardy, kásipkerlik jobalardy jáne turǵyn úı qurylystaryn elektr jelilerine qosýǵa qajetti rezervtiń bar ekenin kórsetedi.
Qoldanystaǵy jelilerdiń tozýyn tómendetý jáne elektrmen jabdyqtaý senimdiligin arttyrý maqsatynda Memleket basshysynyń tapsyrmasyna sáıkes «Energetıkalyq jáne kommýnaldyq sektordy jańǵyrtý» ulttyq jobasy aıasynda oblysta aýqymdy jumystar júzege asyrylýda. Atap aıtqanda, jalpy quny 10 mlrd teńgeni quraıtyn, 501 shaqyrym elektr jelisin qaıta qurý boıynsha úsh jobany júzege asyrý bastaldy. Qazirgi ýaqytta tirekter men áýe jelilerin montajdaý jumystary júrgizilýde, munyń jalpy oryndalýy – 78 paıyz.
- Sondaı-aq bıyl jalpy quny 16,5 mlrd teńge 1 113 km elektr jelilerin jáne 2 qosalqy stantsııany qaıta qurýdy kózdeıtin 7 jobany iske asyrý josparlanǵan. Atalǵan jobalardy júzege asyrýǵa 4,7 mlrd teńge (jalpy qunynyń 30 paıyzy) kóleminde qarjy qarastyryldy, - dep qosty basqarma basshysy.
Eske sala keteıik, budan buryn Batys Qazaqstanda energetıka salasyn jańǵyrtý baǵytynda ne istelip jatqanyn jazǵan edik.
BQO-da ulttyq joba aıasynda energetıkalyq nysandar jańǵyrtylyp jatqany habarlandy.
