Óskemende 1 715 búldirshin balabaqshaǵa bara almaı otyr

ÓSKEMEN. KAZINFORM — Óskemende balabaqsha sany az. Qalada balabaqsha jasyndaǵy 1 715 bala áli kúnge óz kezegin kútip otyr.

Ásirese, Jibek mata kombınaty yqshamaýdanynda balabaqsha máselesi ózekti bolyp tur. Qarqyndy damyp kele jatqan aýdanda jańa turǵyn úı kesheni kóp, onda kóbine jas otbasylar turady. Mundaǵy balalar balabaqshaǵa barý úshin ázirge kezegin kútýden basqa amaly joq. 

Shyǵys Qazaqstan oblysy bilim basqarmasynyń málimetinshe, qazir Óskemende 101 mektepke deıingi mekeme jumys isteıdi, olarǵa 17 054 bala barady.

— Onyń ishinde 14 730 bala balabaqshalar men shaǵyn ortalyqtarda, taǵy 2 324 bala mektepterdegi mektepaldy daıarlyq synyptarynda oqıdy. Sonymen qatar, turǵyn úı qurylysynyń belsendi júrgizilýine baılanysty oryn tapshylyǵy Jibek mata kombınaty yqshamaýdanynda bar. Onda kezekte 1 715 bala tur, — dep habarlady ShQO bilim basqarmasy.

Basqarma mektepke deıingi bilim berý mekemelerin ashý qarqyny áli kúnge suranysty tolyq oryndaı almaı otyrǵanyn moıyndaıdy.

Qalada qańtar aıynan bastap 392 jańa oryn ashyldy, jyl sońyna deıin olardyń sanyn 812-ge jetkizý josparlanǵan. Degenmen, bul sharalardyń ózi máseleni tolyq sheshpeıdi. 

Óskemende bıyl 1 naýryzdan bastap mektepke deıingi bilim berýdi vaýcherlik qarjylandyrý mehanızmi engizildi. Bul júıege memlekettik baǵdarlama boıynsha 82 balabaqsha kóshti. 1 naýryz ben 11 jeltoqsan aralyǵynda 22 657 joldama berildi.

Aıta keteıik, buǵan deıin elimizde «Jasyl balabaqshalar» sany artyp kele jatqanyn jazǵan bolatyntyz.