Óskemende 17 jastaǵy jigit sýǵa batyp kóz jumdy
ÓSKEMEN. QazAqparat – Óskemen qalasynda arnaıy jabdyqtalmaǵan orynda shomylǵan jasóspirim sýǵa batyp ketti, dep habarlaıdy QazAqparat tilshisi.
Qalalyq tótenshe jaǵdaılar basqarmasy baspasóz qyzmetiniń málimetine súıensek, búgin ruqsat etilmegen jerge sýǵa túsý úshin barǵan jigitter qaýipsizdik sharalaryn saqtamaǵan. Shomylyp júrgen jasóspirimderdiń biri qatty aǵysqa tótep bere almaı batyp ketken.
«Qutqarýshylar 17 jastaǵy jigittiń denesin alyp shyqty. Ol Ertis ózenindegi arnaıy jabdyqtalmaǵan orynda sýǵa shomylǵan» delingen habarlamada.
TJ ókilderiniń málimetinshe, shomylý maýsymy áli bastalǵan joq. Osy rette, qutqarýshylar demalys oryndary men jaǵajaılarda reıd júrgizip jatyr.
Ókinishke qaraı, qaýipsizdik sharalaryn elemeı, óz ómirin qaýip-qaterge tikken turǵyndar áli de anyqtalyp jatyr.
