Óskemende 16 jastaǵy esirtki kýreri ustaldy

ÓSKEMEN. QazAqparat – Óskemende 16 jastaǵy bozbala esirtki jasyrýmen aınalysyp kelgen, dep habarlaıdy QazAqparat Polisia.kz saıtyna silteme jasap.

Ustaý barysynda odan untaq pen túıirshik túrindegi 77 túıinshek tabyldy.

«Refleks» jáne «Qarasora» jedel-profılaktıkalyq is-sharasy barysynda oblys ortalyǵynda Óskemen qalalyq polıtsııa basqarmasy patrýldik polıtsııa batalonynyń qyzmetkerleri ınternet-dúkenniń 16 jastaǵy esirtki kýrerin ustady. Jas tártip buzýshynyń arqa qorjynyn tintý kezinde polıtseıler untaq jáne túıirshik túrindegi zaty bar, syrty ızolentamen oralǵan 77 túıinshekti tapty. Sonymen qatar ustalǵan adamnyń turǵylyqty jerine tintý júrgizildi. Onda aldyńǵy zattarǵa uqsas 106 túıinshek tárkilendi», - delingen polıtsııa málimetinde.
Júrgizilgen saraptama kórsetkendeı, kúdiktiden alynǵan 183 túıinshekte 26,95 gramm «alfa-pvp» psıhotroptyq zaty jáne shamamen 37 gramm mefedron bolǵan.

«Jasóspirim ata-anasynyń kepilgerligine berildi. Atalǵan fakti boıynsha Qylmystyq kodekstiń 297-baby 3-bóligimen sotqa deıingi tergeý júrgizilip jatyr. Esirtki kýrerin on jyldan on bes jylǵa deıingi merzimge bas bostandyǵynan aıyrý jazasy kútip tur», - dep naqtylady polıtsııadan.

Foto: polisia.kz