Óskemende 150 dúkendegi áleýmettik mańyzy bar azyq-túliktiń baǵasy tekserildi

ÓSKEMEN. QazAqparat – Óskemen qalasynda 150 dúkendegi áleýmettik mańyzy bar azyq-túliktiń baǵasy tekserildi, dep habarlaıdy QazAqparat tilshisi.

Óskemende arnaıy qurylǵan monıtorıngilik toptar saýda úılerinde, dúkenderde, turaqtandyrý qorynyń pavılondarynda áleýmettik mańyzy bar azyq-túlik baǵasynyń qymbattaýyna jol bermes úshin turaqty túrde baqylaý júrgizýde. Onyń quramyna kásipkerlik bóliminiń mamandary, jergilikti ózin-ózi basqarýdyń aýmaqtyq keńsesi men Nur Otan partııalyq baqylaý komıssııasynyń músheleri kirip otyr.

«Búginde qala boıynsha 150 dúkendegi 19 túrli taýardyń baǵasy tekserilip, kásipkerlerge túsindirý jumystary júrgizildi. Keıbir saýda oryndarynda jekelegen ónim túrleri boıynsha baǵa ústemesiniń 30 paıyzǵa deıin óskeni anyqtalǵan. Dúken ıesine eskertý jasalyp, áleýmettik mańyzy bar azyq-túliktiń quny óndirýshiniń nemese kóterme jetkizýshiniń baǵasynan 15 paıyzdan asyrylmaýy qajettigi túsindirildi», - deıdi qala ákiminiń orynbasary Arman Ysqaqov.

Onyń aıtýynsha, saýda oryndarynyń basym bóliginde taýar baǵasyna qoıylatyn talaptar saqtalǵan.