Óskemende 15 jyl buryn salyna bastaǵan kolledj qalaı «saqaldy qurylysqa» aınaldy
ÓSKEMEN. KAZINFORM – Óskemen qalasyndaǵy Іlııas Esenberlın dańǵyly boıynda ornalasqan burynǵy mashına jasaý kolledjiniń ǵımaraty – óńirdegi eń uzaqqa sozylǵan ári eń daýly qurylystardyń biri. 2011 jyly bastalǵan bul joba áýelde elimizdiń tehnıkalyq jáne kásiptik bilim berý júıesin damytýǵa arnalǵan aýqymdy memlekettik bastamanyń bir bóligi bolǵan. Alaıda arada on jyldan astam ýaqyt ótse de, nysan tolyq paıdalanýǵa berilmeı, jemqorlyq, talan-taraj ben jaýapsyzdyqtyń sımvolyna aınaldy.
Kolledj qurylysy Qazaqstan Respýblıkasynda tehnıkalyq jáne kásiptik bilim berýdi damytýdyń 2008-2012 jyldarǵa arnalǵan memlekettik baǵdarlamasy aıasynda qolǵa alynǵan.
Joba boıynsha Óskemende mashına jasaý salasyna arnalǵan 700 oryndyq óńiraralyq kásiptik ortalyq salynýy tıis edi. Tapsyrys berýshi – QR Bilim jáne ǵylym mınıstrligi. Qarjylandyrý respýblıkalyq bıýdjet esebinen júrgizildi.
30 516 sharshy metr aýmaqty alyp jatqan jer teliminiń jartysynan astamynda, naqtyraq aıtqanda 17 500,92 sharshy metrinde ǵımarattar salyna bastaǵan. Alaıda 2012 jyly jaǵdaı kúrt ózgerdi. Jobalyq-smetalyq qujattamadan aýytqýlar anyqtalyp, ashananyń jeke turǵan ǵımaratynyń eden plıtasy qulady.
Sondaı-aq QR Bilim jáne ǵylym vıtse-mınıstri S.B.Shaıahmetovke, «ZAK Servıs» JShS merdiger uıymyna, «Bilim jáne ǵylym obektileriniń salynyp jatqan ǵımarattar dırektsııasy» JShS-ǵa jáne basqa da adamdarǵa qatysty bıýdjet qarajatyn urlaý boıynsha qylmystyq isterdiń qozǵalýyna baılanysty qurylys toqtatyldy. Sóıtip, aıaqtalmaǵan nysan qaraýsyz qaldy.
Tonaýǵa túsken ǵımarat
Qurylys toqtaǵan jyldar ishinde nysan birneshe ret tonalǵan. Qorshaýsyz, kúzetsiz qalǵan ǵımarattan qurylys materıaldary, metall konstrýktsııalar qoldy bolǵany turǵyndarǵa da, jergilikti bılikke de belgili.
Aıaqtalmaı qalǵan kolledj ǵımaraty tek memlekettik jospardyń sátsizdigin ǵana emes, osy mańda turatyn turǵyndardyń kúndelikti úreıin de aıqyn kórsetip otyr. Qańyrap qalǵan qurylys jyldar boıy qaraýsyz qalyp, birte-birte zańsyz áreketterdiń ordasyna aınalǵan.
Nysannyń dál artyndaǵy kópqabatty úılerdiń birinde turatyn turǵyndardyń aıtýynsha, ǵımarattyń tonalýy ashyq túrde, esh jasyrynýsyz júrgen.
– Bul jerdi kóz aldymyzda tonady. Kúndiz de, túnde de kólikter kelip-ketip jatatyn. Bireýler kiredi, bireýler shyǵady. Biz onyń qurylys jumystary emes, tonaý ekenin anyq kórdik, - deıdi bes jyldan beri osy mańda turatyn azamattardyń biri.
Onyń sózinshe, qurylys alańy eshqashan tıisti túrde qorshalmaǵan. Qaqpasy ashyq, kúzeti joq.
– Keıin bul jer úıi joq adamdardyń, jasóspirimderdiń mekeni boldy. Balalar ishke kirip, aralap júretin. Birdeńe qulap ketse kim jaýap beredi dep qorqatynbyz, - deıdi ol.
2018 jyly «Memlekettik múlikti respýblıkalyq menshikten kommýnaldyq menshikke berý» týraly sheshimmen nysan Óskemen qalasynyń menshigine ótti. Al 2021 jyly oblystyq kommýnaldyq menshikke berildi.
Kolledj emes mektep salynady
Oblys ákiminiń tapsyrmasymen bul nysan keıinnen jekeshelendirý tetigi arqyly satylǵan. 2023 jyldyń naýryz aıynda aıaqtalmaǵan ǵımaratty «VK INVEST COMPANY» JShS satyp aldy.
– Satyp alýshy nysandy 1000 orynnan asatyn jalpy bilim beretin mektepke aınaldyrý jónindegi qujattardy resimdedi, - delingen ShQO ákimdiginiń aqparatynda.
Shyǵys Qazaqstan oblysynyń memlekettik satyp alý basqarmasynyń basshysy Rýstam Baıyrbekovtyń aıtýynsha, mektep salý qajettiligi óńirdegi naqty áleýmettik suranystan týǵan.
– Jibek matalar kombınaty yqshamaýdanyndaǵy mektepterde 1823 oryn tapshy. Sondyqtan nysannyń bastapqy maqsatyn ózgerip, mektepke aınaldyrý týraly sheshim qabyldandy, - deıdi ol.
Qoldy bolǵan qurylystyń qalpyna kelip, jalpy bilim beretin mektep bolatynyna turǵyndar rıza.
– Osy qańyrap qalǵan qurylystyń mańynda salynǵan úıge kóship kelgenimizge tórt jyldan asty. Balalarymyz osy jerde oqysa dep armandaımyz. Úıimizge óte jaqyn. Buryndary daryndy balalarǵa arnalǵan mektep bolady dedi. Endi jalpy bilim beretin mektep bolady eken. Bizge de keregi osy, - dedi Ál-Farabı kóshesiniń turǵyny Aınash.
Qurylys qaı kezeńde
Memlekettik satyp alý basqarmasy basshysynyń aıtýynsha, qazirgi ýaqytta qurylys montajdaý jumystary júrgizilmeıdi. Daıyndyq bastalyp ketken.
– ShQO Qarjy basqarmasy mekteptiń jobalyq qýatyn 880-den 1000 orynǵa ózgertý týraly satyp alý-satý shartyna qosymsha kelisimge qol qoıdy jáne vedomstvodan tys saraptama qorytyndysyn alǵan sátten bastap 18 aı ishinde qurylystyń aıaqtalý kezeńi aıqyndaldy, - dedi Rýstam Baıyrbekov.
Eske salsaq, buǵan deıin Óskemende jańa mektepter salynyp jatqanyna qaramastan oryn tapshylyǵy áli ózekti ekenin jazǵan bolatynbyz.