Óskemende 12 jasar mektep oqýshysy aqsha taýyp alǵan soń, joǵalyp ketken
ÓSKEMEN. QazAqparat - Óskemende polıtseıler kámelettik jasqa tolmaǵan oqýshyǵa izdeý saldy, dep habarlaıdy QazAqparat qalalyq PB baspasóz qyzmetine silteme jasap.
14 mamyrda saǵat 20:24-te jergilikti turǵyndardyń biri polıtsııaǵa 6-synypta oqıtyn 2007 jylǵy qyzynyń joǵalyp ketkenin aıtyp, habarlasqan. Qyz osy kúni saǵat 13:00-de mektepke baryp, uıaly telefony men sómkesin qaldyryp, anasynyń kútip otyrǵanyn aıtqan. Biraq, úıine barmaǵan.
Polıtsııa basqarmasynyń barlyq jeke quramy jumyldyrylyp, jasóspirimdi «Dıýımovochka» dúkeniniń mańynan tapty.
Belgili bolǵandaı, sol kúni kámelettik jasqa tolmaǵan oqýshy mektepke kelip, kezekshiden sómkesi men uıaly telefonyn berip jibergen. Al, ózi qalaǵa qydyrýǵa ketken, sebebi mektepke kele jatqan kezde joldan 5 myń teńge taýyp alǵan.
Onyń joǵalyp ketkenin anasy qyzyn alyp ketý úshin mektepke kelgende biraq bilgen. Osy fakti boıynsha ýaqytyly habarlamaǵan synyp jetekshisine qatysty ákimshilik is qozǵaldy.
Ár apta saıyn 102 kanalyna iz-túzsiz joǵalyp ketken jasóspirimder týraly habar túsedi. 2019 jyldyń basynan beri kámelettik jasqa tolmaǵan 37 jasóspirimge izdeý salynyp, 36 jastyń qaıda ekeni anyqtaldy.
«Eger bala úıden shyǵyp, qaıta oralmasa ata-analarynyń polıtsııaǵa shuǵyl habarlasýyn suraımyz. Sebebi, ol shuńqyrǵa túsip ketýi, ormanda adasýy, qylmystyń qurbany bolýy múmkin. Eger ata-analary polıtsııaǵa birden kelmeı, bir táýlikten keıin habarlassa, olardy mindetin durys oryndamaǵandyqtary úshin jaýapqa tartý týraly máseleni qozǵaımyz», - dep pikir bildirdi Óskemen qalalyq PB bastyǵy Dáýir Ibraev.
