Óskemende 12 aýlany abattandyrýǵa 900 mln teńge bólindi
ÓSKEMEN. QazAqparat - Oblys ortalyǵynda kóp qabatty turǵyn úılerdiń aýlasyn jańa zaman talabyna saı abattandyrý úshin 900 mln teńge bólindi. Merdigerler bul somany kúzge deıin ıgerip bitirýge mindet alyp otyr, - dep habarlaıdy QazAqparat tilshisi.
Aımaqtyń bas shaharyn abattandyrý jumystarymen tanysqan oblys ákimi Danıal Ahmetov bıyl 80 turǵyn úıdi qamtıtyn 12 aýla jańasha abattandyrylatynyn aıtty. Abattandyrý kartasyna engen aýmaqta úıler arasyndaǵy kólik joldary 6 metrge deıin keńeıtilip, balalarǵa arnalǵan oıyn alańqaıy men jastarǵa arnalǵan Street Workout alańy, eresekterge arnalǵan suhbat shatyrlary ornatylatyn bolady. Bul maqsatqa qajet 900 mln teńgeniń birinshi transhy berilgenimen, jaýapty merdiger jumysqa áli kirispegen.
«Bir jolda qaladaǵy búkil aýlany qamtý múmkin emes. Sondyqtan ár turǵyn aýdannan alańdar iriktep alynǵan bolatyn. Qalalyq turǵyn úı kommýnaldyq sharýashylyq bólimi endi ózderi josparlaǵan mejeni oryndaı almaı otyr. Bir aptadan keıin osy jerge qaıta kelemin. Sol kezde munda jumys qyzý júrip jatýy kerek. Qalǵan transh sol kezde ǵana bólinedi», - dedi ákim.
Jalpy, Óskemen boıynsha barlyǵy 300 aýlany abattandyrý josparlanǵan.
