Óskemende 11 ýchaskeni sý basý qaýpi bar
Qalalyq TJB baspasóz qyzmetiniń málimetine súıensek, qazirgi ýaqytta Óskemen boıynsha 11 ýchaskede sý basý qaýpi bar ekendigi anyqtaldy.
«Onyń ishinde Sogra kentindegi Skalıstaıa, Drýjınnıkov kóshelerinde, «Vostochnık-5», «Vostochnık-6» baý-baqsha seriktestikterinde sý basý qaýpi joǵary bolyp otyr. Soǵan oraı Sograda sý tasqynyna qarsy profılaktıkalyq sharalar júrgizilýde. Kenttegi Mahovka ózeniniń boıynda úıler bar. Sońǵy ret 2018 jyly bul úılerdi sý basqan bolatyn», - deıdi basqarma bastyǵynyń orynbasary Dastan Ahmetov.
Onyń aıtýynsha, bıyl Mahovka ózeniniń sýy arnasynan aspaýy úshin jaǵalaýdy nyǵaıtý jumystary júrgizildi. Sondyqtan úılerdi sý basý qaýpi barynsha azaıtylǵan.
«Bir aıta keterligi, keıbir adamdar ózenge qoqys tastap, sý basý qaýpin ózderi týdyrady. Tipti Mahovka ózenin tazartý barysynda dıvan da tabylǵan. Sondyqtan turǵyndardan barynsha tazalyq saqtap, tabıǵatqa zalal keltirmeýdi suraımyz», - deıdi Dastan Ahmetov.