Óskemende 11 shildege deıin karantın sharalary kúsheıtildi

ÓSKEMEN. QazAqparat – Óskemen qalasynda 27 maýsymnan bastap 11 shildege deıin karantın sharalary kúsheıtildi, dep habarlaıdy QazAqparat tilshisi.

Bul týraly qalanyń bas memlekettik sanıtar dárigeriniń 25 maýsymdaǵy qaýlysynda jazylǵan. Qujattaǵy derekterge sáıkes, sońǵy táýlikte vırýs juqtyrǵandar sany 25,4%-ǵa, al apta kóleminde 16,6%-ǵa artty.

Osyǵan baılanysty turǵyndar jeke kóligimen jumys kúnderinde memlekettik nómirdiń sońǵy sanynyń «jup» jáne «taq» bolýyna baılanysty júredi.

Sondaı-aq jeke kólik quraldarymen túngi saǵat 22:00-den 05:00-ge deıin, budan bólek mereke jáne demalys kúnderi jolǵa shyǵýǵa tyıym salynǵan. Turǵyndardyń qozǵalysy da tek ruqsattama arqyly júzege asady.

Shaharda sport, kontsert jáne adam kóp shoǵyrlanatyn basqa da is-sharalardy ótkizýge áli de ruqsat berilmeıdi. Saýda nysandarynyń jumys ýaqyty shekteledi. Mysaly, azyq-túlik saýdalaıtyn dúkender saǵat 08:00-den 20:00-ge deıin, al monshalar men saýnalar 15:00-den 20:00-ge deıin jumys isteıdi.

Alaıda azamattarǵa demalys kúnderi jeke kóligmen «jup» jáne «taq» qaǵıdaty boıynsha saıajaı men baý-baqsha ýchaskelerine barýǵa ruqsat etildi.

Sonymen qatar qoǵamdyq kólik jumys kúnderi 50%-ǵa qysqartylsa, demalys pen mereke kúnderinde múlde júrmeıdi.