Óskemende 100-ge jýyq zańsyz kúresin anyqtaldy

ÓSKEMEN. QazAqparat - Óskemende 92 zańsyz kúresin bar. Olardyń 70-si jeke menshik aýmaqta jatyr, dep habarlaıdy QazAqparat tilshisi. 

Oblystyq ekologııalyq qaýipsizdik ortalyǵynyń mamandary tamyz aıynan beri oblys turǵyndarynan zańsyz kúresinder týraly shaǵymdar jınaǵan bolatyn. Jazbasha aryz-hattar men WhatsApp jelisi arqyly jetken málimetter boıynsha zańsyz qoqys alańdarynyń biryńǵaı tizimi jasalypty. 

«Bizge kelip túsken málimetterdiń barlyǵyn toptap, prokýratýraǵa joldaǵanbyz. Qalalyq turǵyn úı-kommýnaldyq sharýashylyq bóliminiń, jergilikti polıtsııa qyzmetiniń, «Óskemen-Tártip» mekemesiniń ókilderi sol málimetter boıynsha arnaıy reıdke shyǵyp, 22 kúresindi bir aptanyń ishinde joıdy» - deıdi Ekologııalyq qaýipsizdik ortalyǵynyń mamany Elena Polıantseva. 
Qalǵan 70 kúresinniń kózin joıýǵa qaǵazbastylyq kedergi keltirip otyrǵan kórinedi. 

«Tizimde taǵy 70 kúresin bar. Olardyń kózin joımas buryn ákimdik ıesiz dep tanýy tıis. Atalmysh kúresinder jeke menshiktiń aýmaǵynda jatqandyqtan, ózdigimizden joıýǵa quqymyz joq» - deıdi «Óskemen-Tártip» mekemesiniń dırektory Tamara Rahymjanova.

Zańsyz kúresinderdiń kóbeıýine turǵyndardyń qoqys shyǵarý qyzmeti úshin kelisimshartqa otyrmaýy túrtki bolyp otyr. Qalalyq ishki ister basqarmasynyń basshysy Dáýir Ibraevtyń aıtýynsha, qala boıynsha turǵyn úı ıeleriniń úshten biri turmystyq qaldyq shyǵarý qyzmetimen kelisimshartqa otyrmaǵan. Qoqysty belgilenbegen orynǵa tókkeni úshin jyl basynan beri 754 adamǵa qaýly toltyrylǵan.