Óskemende 10 jolǵa oń jaq burylystar jasalady

ÓSKEMEN. QazAqparat – Bıyl Óskemen qalasynda 10 jolǵa oń jaq burylystar jasalady, dep habarlaıdy QazAqparat tilshisi.

Qala ákimdiginiń málimetine súıensek, kólik keptelisin azaıtý, júrgizýshilerge qıylystardaǵy qozǵalysty yńǵaıly etý úshin osy ýaqytqa deıin birqatar jolǵa oń jaq burylys jasalǵan. Bul maqsattaǵy jumystar bıyl da jalǵasyn tappaq.

«Osy bastama alǵash ret úsh jyl buryn kóterilgen bolatyn. Turǵyndar oń jaq burylystar jaıly jaqsy pikir bildirýde.

Osy jyly burylystar kezeń-kezeńimen birneshe jolda jasalatyn bolady. Áýelde 9 jolǵa, atap aıtqanda Qazaqstan-Qabanbaı batyr, Jaǵalaý-Qabanbaı batyr, Myzy-Qazaqstan kósheleriniń, Abaı dańǵyly-Pýtevaıa kóshesiniń, Shákárim-Abaı dańǵyldarynyń, Ótepov kóshesi men Sátbaev dańǵylynyń qıylystarynda jáne Sol jaǵalaý emhanasynan Sátbaev dańǵylyna shyǵatyn jolda salynady.

Sondaı-aq Novatorov-Qabanbaı batyr kóshesiniń qıylysynda eki jaqqa da burylys jasalady», - dedi shahar basshysy Jaqsylyq Omar.

Onyń aıtýynsha, qurylys jumystary júrgiziletin joldar halyq arasynda bolǵan saýalnama nátıjeleri boıynsha tańdalyp otyr.