Óskemende 10 jasar qyz kir jýǵysh mashınaǵa keptelip qaldy
ÓSKEMEN. QazAqparat – Shyǵys Qazaqstan oblysynda 10 jasar qyz kir jýǵysh mashınaǵa keptelip qaldy, dep habarlaıdy QazAqparat ShQO Tótenshe jaǵdaılar departamentiniń baspasóz qyzmetine silteme jasap.
Vedomstvo ókilderiniń málimetinshe, Belyı Kamen aýylyndaǵy úılerdiń birinde jasyrynbaq oınap júrgen 10 jastaǵy qyz kir jýǵysh mashınaǵa baryp, jasyrynǵan. Keıin ol ózdiginen álgi qurylǵydan shyǵa almaı qalǵan.
«PCh-28 bóliminiń ókilderi mashınanyń keıbir bólshekterin ajyratyp, qyzdy shyǵaryp aldy. Oqıǵa ornyna shaqyrylǵan jedel járdem qyzmetiniń ókilderi qyzdyń zardap shekpegenin, denesinde eshqandaı jaraqat nemese synǵan músheler joq ekenin aıtty» - delingen ShQO TJD baspasóz habarlamasynda.
Qutqarýshylar balalardy qaraýsyz qaldyrýdyń qanshalyqty qaýipti ekenin taǵy da eskertti.
«Óte saq bolyńyzdar! Balalaryńyzben muqııat túsindirý jumystaryn júrgizińizder. Olarǵa qaýipsizdik sharalaryn saqtaýdyń qanshalyqty mańyzdy ekenin eskertińizder!»,-delingen tótenshe jaǵdaılar qyzmetiniń ókilderiniń eskertpesinde.
Rýslan Shaqabaev
