Óskemende 1 qazannan bastap úılerge jylý beriledi

ÓSKEMEN. KAZINFORM — Óskemen qalasynda áleýmettik nysandarǵa jylý berile bastady.

Qala turǵyndary úılerine jylý berilmeı kele jatqanyna narazylyq bildirgen edi. Al sınoptıkter bolsa aldaǵy kúnderi aýa raıy salqyn ári jaýyndy bolatyndyǵyn boljaǵan-tuǵyn.

Osyǵan baılanysty Óskemende jylytý maýsymy josparlanǵan ýaqyttan erterek bastalatyn boldy. Bul týraly qala ákimdiginen habarlady.

— 1 qazannan bastap kópqabatty turǵyn úılerge jylý beriledi. Al mektepterde, balabaqshalarda, medıtsınalyq mekemelerde jáne basqa da áleýmettik nysandarda jylý berý jumystary qazirdiń ózinde bastalyp ketti. Aýa raıynyń salqyndaýyna baılanysty jáne turǵyndar úshin qolaıly jaǵdaı jasaý maqsatynda jylytý maýsymyn erte bastaý týraly sheshim qabyldanyp otyr, — delingen aqparatta.

Eske salsaq, osyǵan deıin Aqtóbede erteńnen bastap áleýmettik nysandarǵa jylý beriletindigi habarlanǵan.